కావాలంటే నన్ను అరెస్ట్ చేసుకోండి: కమల్

తమిళ స్టార్ హీరో కమల్ హాసన్ హోస్టింగ్ చేస్తోన్న బిగ్ బాస్ షో ఆదిలోనే వివాదాస్పదమైంది. ఈ షోలో పాల్గొంటున్న కొంతమంది సెలబ్రిటీలు చేస్తున్న కామెంట్స్, మాట్లాడుతున్న తీరు, వ్యవహారం, వేషధారణ వంటివి హిందువుల మనోభావాలు కించపర్చేవిగా వున్నాయని నిరసన వ్యక్తంచేసిన హిందూ మక్కల్ కచ్చి అనే సంస్థ వారితోపాటు కమల్ హాసన్‌ని కూడా అరెస్ట్ చేయాలని డిమాండ్ చేసింది.

అయితే, ఈ వివాదంపై స్పందించిన కమల్ హాసన్... ఇందులో అంత అభ్యంతరకరమైనది ఏమీ లేదని అన్నారు. "ఒక వేళ తమిళులు, హిందువుల మనోభావాలు దెబ్బతినే రీతిలో ఏమైనా అభ్యంతరాలు వుంటే, ముందుగా తానే క్షమాపణాలు చెప్పుకుంటానని తెలిపారు. కాకపోతే ఈ విషయలో మాత్రం అటువంటిదేమీ జరగలేదని స్పష్టంచేశారు. అయినప్పటికీ మీరు సంతృప్తిపడకపోతే, తనని అరెస్ట్ చేసుకోవచ్చని.. అందుకు తనకి ఏ అభ్యంతరాలూ లేవని హెచ్ఎంకేకి తేల్చిచెప్పారు కమల్.