Me Too: పబ్లిసిటీ కోసమే ‘మీటూ’ రాతలు.. సీనియర్ నటుడు అశ్రానీ

#MeToo ఉద్యమం అంతా బూటకమని, పాపులారిటీ కోసమే అలాంటి రాతలు రాస్తున్నారంటూ బాలీవుడ్ సీనియర్ నటుడు, దర్శకుడు అశ్రానీ వివాదాస్పద వ్యాఖ్యలు చేశారు. అశ్రానీ హిందీలో షోలే‌తోపాటు 350 సినిమాల్లో నటించారు. ఆరు సినిమాలకు దర్శకత్వం వహించారు. మీటూపై ఓ వార్తా సంస్థతో మాట్లాడుతూ ఆయన ఈ వ్యాఖ్యలు చేశారు.

‘‘నేను మహిళలను గౌరవిస్తాను. ప్రతి ఒక్కరూ గౌరవించాలి కూడా. సినిమా ప్రమోషన్లలో భాగంగా కొందరు దీన్ని పబ్లిసిటీకి వాడుకుంటున్నారు. వీటిలో 90 శాతం అసత్యాలు. పత్రికల ద్వారా పాపులారిటీ సంపాదించేందుకే ఇలా చేస్తున్నారు. వీటిని సీరియస్‌గా తీసుకోవల్సిన అవసరం లేదు. మహత్మాగాంధీ ఆటో బయోగ్రఫీ రాస్తే ఎవరూ చదవరు. అదే మాధురీ దీక్షిత్ లేదా మధుబాల ఆటోబయోగ్రఫీలు రాస్తే ప్రజలు ఎగబడి చదువుతారు’’ అని పేర్కొన్నారు.

న్యూయార్క్‌లో హాలీవుడ్ నిర్మాత హార్వే వేన్ స్టెన్‌తో ఏడాది కిందట ప్రారంభమైన ఈ #MeToo ఉద్యమం ఇప్పుడు ఇండియాలో ప్రకంపనలు సృష్టిస్తోంది. వివిధ రంగాలకు చెందిన మహిళలు తాము ఎదుర్కొన్న లైంగిక వేదించినవారి పేర్లను బయటపెడుతూ వణుకు పెట్టిస్తున్నారు. బాలీవుడ్ నటుడు నానా పాటేకర్‌పై నటి తనుశ్రీ దత్త లైంగిక వేదింపుల ఆరోపణలు చేసిన రోజు నుంచి ఇండియాలో మీటూ ఉద్యమంగా సాగుతోంది. అయితే, సీనియర్ నటుడు అశ్రానీ వ్యాఖ్యలపై మీటూ మద్దతుదారులు ఆగ్రహం వ్యక్తం చేస్తున్నారు.