ఇంట్లో ఫ్యాన్‌కి ఉరేసుకున్న సినీ నటి

చిన్నచిన్న విషయాలకే పెద్ద పెద్ద నిర్ణయాలు తీసుకుంటున్న సినీ ప్రముఖులు క్షణికావేశంలో అర్ధాంతరంగా తనువు చాలిస్తున్న ఘటనలు నిత్యం ఏదో ఓ చోట వెలుగుచూస్తూనే వున్నాయి. ముంబైలో సినీ నటి, మోడల్ సూసైడ్ మిస్టరీ ఇంకా పూర్తిగా వీడకముందే తాజాగా అస్సామీస్ హీరోయిన్ కమ్ సింగర్ ఒకరు ఇంట్లో సీలింగ్ ఫ్యాన్‌కి ఉరేసుకుని ఆత్మహత్య చేసుకోవడం అక్కడి ఫిలిం ఇండస్ట్రీని తీవ్ర దిగ్భ్రాంతికి గురిచేసింది. అస్సాం సినీపరిశ్రమలో ప్రముఖ నటిగా, గాయనిగా పేరున్న బిదిష బెబ్జర్వ(27) గురుగ్రామ్‌లోని తన ఇంట్లో ఉరేసుకుని తనువు చాలించారు. సోమవారం సాయంత్రం జరిగిన ఈ ఘటన ఆలస్యంగా వెలుగుచూసింది.

గతేడాదే గుజరాత్‌కి చెందిన నిషీత్ ఝాతో బిదిషకి వివాహమైంది. కానీ ఆ తర్వాత అతడితో విభేదాలు తలెత్తడంతో వారి వైవాహిక జీవితం చిక్కుల్లో పడింది. నటి బిదిష తండ్రి ఆమె ఆత్మహత్యపై స్పందిస్తూ.. నిషీత్ ఝాకి మరో యువతితో వివాహేతర సంబంధం వుందని, ఆ కారణంగానే తన కూతురు మనస్థాపానికి గురైందని తెలిపారు. బిదిష తండ్రి ఇచ్చిన ఫిర్యాదు మేరకు కేసు దర్యాప్తు చేపట్టిన పోలీసులు... నిషీత్ ఝానే బిదిష ఆత్మహత్య చేసుకునేలా పురిగొల్పాడనే అభియోగాల కింద అతడిపై కేసు నమోదు చేశారు.

అస్సాం నటి బిదిష ఆత్మహత్యకి పాల్పడంపై విచారం వ్యక్తంచేసిన అస్సాం ముఖ్యమంత్రి సర్బానంద సోనోవాల్.. ఈ ఘటనపై విచారణ జరిపించాల్సిందిగా హర్యానా ముఖ్యమంత్రి మనోహర్ లాల్ ఖత్తార్‌ని కోరారు.