‘NRI’ మూవీ ఓపెనింగ్.. ప్రత్యేక ఆకర్షణగా అక్కినేని ఫ్యామిలీ

అవసరాల శ్రీనివాస్, మంచు లక్ష్మి, మహతి ప్రధాన పాత్రల్లో తెరకెక్కుతోన్న చిత్రం ‘NRI - నాయనా..! రారా ఇంటికి’. ఈ సినిమా ద్వారా బాల రాజశేఖరుని దర్శకుడిగా పరిచయం అవుతున్నారు. ప్రదీప్ కేఆర్ ఈ చిత్రాన్ని నిర్మిస్తున్నారు. ఈ చిత్ర ప్రారంభోత్సవం ఫిబ్రవరి 20న ఉదయం 11.30 గంటలకి, హైదరాబాద్‌లోని అన్నపూర్ణ స్టూడియోలో జరిగింది. ఈ కార్యక్రమంలో అక్కినేని ఫ్యామిలీ ప్రత్యేక ఆకర్షణగా నిలిచింది. ముహూర్తపు సన్నివేశానికి అక్కినేని అమల క్లాప్ నిచ్చారు. అలాగే అక్కినేని ఫ్యామిలీ నుంచి అఖిల్, సుమంత్, సుశాంత్ పాల్గొన్నారు. హీరో నాని కూడా ఈ కార్యక్రమంలో ప్రత్యేక ఆకర్షణగా నిలిచారు.

ఈ చిత్రానికి సిరివెన్నెల సీతారామశాస్త్రి తనయుడు యోగేశ్వర శర్మ సంగీతం సమకూరుస్తున్నారు. చిత్రంలోని పాటలన్నింటికీ సిరివెన్నెల సీతారామశాస్త్రి సాహిత్యం అందిస్తున్నారు. అవసరాల, మంచు లక్ష్మి, మహతితో పాటు నాగబాబు ముఖ్య పాత్ర పోషిస్తున్నారు. చిత్ర ప్రారంభోత్సవ కార్యక్రమంలో సిరివెన్నెల సీతారామశాస్త్రి, ఇంద్రగంటి మోహన్‌కృష్ణ, ఆర్పీ పట్నాయక్, యోగేశ్వర శర్మ తదితరులు పాల్గొన్నారు.

See Photos: అవసరాల శ్రీనివాస్ ‘NRI’ సినిమా ప్రారంభోత్సవం

కాగా.. రచయితగా, అసిస్టెంట్ డైరెక్టర్‌గా తెలుగు చిత్రసీమలోకి అడుగుపెట్టిన అవసరాల శ్రీనివాస్.. ‘అష్టాచమ్మా’ సినిమాతో నటుడిగా పరిచయమయ్యారు. ‘ఊహలు గుసగుసలాడే’ చిత్రంతో దర్శకుడి అవతారమెత్తి విమర్శకుల ప్రశంసలు అందుకున్నారు. ఓ వైపు నటుడిగా సినిమాలు చేస్తూనే దర్శకత్వమూ వహిస్తున్నారు. కిందటేడాది ‘ఆ!’, ‘మహానటి’, ‘దేవదాస్’, ‘సమ్మోహనం’, ‘అంతరిక్షం’ చిత్రాల్లో అవసరాల నటించారు. కేవలం క్యారెక్టర్ ఆర్టిస్ట్‌గా మాత్రమే కాకుండా హీరోగానూ అవసరాల తన అదృష్టాన్ని పరీక్షించుకున్నారు. ఆయన హీరోగా 2017లో ‘బాబు బాగా బిజీ’ అనే అడల్ట్ కామెడీ సినిమా వచ్చింది. టీజర్, ట్రైలర్లతో ఈ సినిమా కాకరేపినా బాక్సాఫీసు వద్ద మాత్రం బోల్తా కొట్టింది. రెండేళ్ల విరామం తరవాత ఇప్పుడు మళ్లీ హీరోగా చేస్తున్నారు.