తనకి కుడి కన్ను కనిపించదని చెప్పిన రానా దగ్గుబాటి

రానా దగ్గుబాటి నెగటివ్ పాత్రలో నటించిన బాహుబలి 2 రికార్డులు తిరగరాస్తూ కలెక్షన్ల వర్షం కురిపిస్తోంది. హీరోగా లీడ్ క్యారెక్టర్స్ చేస్తున్న సమయంలోనే వచ్చిన ఈ నెగటివ్ పాత్ర ఆఫర్‌ని అనుమానం లేకుండా అందిపుచ్చుకున్నారు రానా. భళ్లాలదేవ పాత్రలో రానా పర్‌ఫార్మెన్స్ చూశాకా... అమరేంద్ర బాహుబలికి సమఉజ్జీగా ఆ పాత్రను పోషించడంలో రానా కాకుండా ఇంకెవ్వరైనా అంతగా సూట్ కాలేరేమో అని అనుకునేలా జీవించారు రానా.

బాహుబలి చిత్రంలో భళ్లాలదేవ పాత్ర పోషించిన రానా దగ్గుబాటి విమర్శకుల ప్రశంసలు అందుకుంటున్న ప్రస్తుత తరుణంలో అతడికి సంబంధించిన ఓ ఆసక్తికరమైన కథనం ఆన్‌లైన్‌లో వైరల్ అవుతోంది. రానా దగ్గుబాటి ఆత్మస్థైర్యాన్ని, అతడిలోని పాజిటివ్ దృక్పథాన్ని చాటిచెప్పి, నలుగురికి ఆదర్శంగా నిలిచే కథనం అది.

గతంలో ఓ టీవీ ఛానెల్ నిర్వహించిన కార్యక్రమంలో ముఖ్య అతిథిగా పాల్గొన్న రానా దగ్గుబాటి, ఆ కార్యక్రమంలో మాట్లాడుతూ.. 'తనకి కుడి కన్ను కనిపించదు' అని వెల్లడించారు. స్టార్ స్టేటస్ వున్న ఓ నటుడు తన గురించి ఏ దాపరికాలు లేకుండా చెప్పడం ఆడియెన్స్‌ని కట్టిపడేసింది. అప్పటివరకు బయటి ప్రపంచానికి తెలియని ఈ విషయాన్ని రానా ఎంతో సింపుల్‌గా చెప్పడం చూసి ఆడియెన్స్ ఆశ్చర్యానికి గురయ్యారు. రానాకి వున్న సింప్లిసిటీ ఏంటో ప్రపంచానికి పరిచయం చేశాయి ఆ కార్యక్రమంలో అతడు చేసిన వ్యాఖ్యలు.

ఆర్థికంగా ఇబ్బందుల్లో వున్న వారికి ఆపన్నహస్తం అందించే లక్ష్యంతో ఓ తెలుగు టీవీ ఛానెల్ గతంలో నేను సైతం అనే కార్యక్రమం నిర్వహించింది. ఈ కార్యక్రమంలో అతిథిగా పాల్గొన్న రానా దగ్గుబాటి.. బాధితులకి బాసటగా నిలవడమేకాకుండా వారిలో మనోధైర్యాన్ని నింపేందుకు తీవ్రంగా కృషిచేసిన సందర్భంలో నాకు కుడి కన్ను కనిపించదని... అయినా నేను ఎంత ధైర్యంతో వున్నానో మీరు కూడా అంతే ధైర్యంగా వుండాలంటూ ఆ కార్యక్రమంలో పాల్గొన్న వారికి సూచించారు.