‘బాహుబలి 2’ మూవీ సీన్ లీక్.. వైరల్!

ఎస్ఎస్ రాజమౌళి ప్రతిష్టాత్మకంగా తెరకెక్కించిన ‘బాహుబలి 2: ది కన్‌క్లూజన్’ సినిమాలోని కొన్ని సీన్లు అప్పుడే ఆన్‌లైన్‌లో సందడి చేస్తున్నాయి. సినిమా విడుదలకు ఒకరోజు ముందే ‘బాహుబలి 2’ తమిళ సినిమా సీన్ ఆన్‌లైన్‌లో తెగ షేర్ అవుతోంది. అదీ కూడా సినిమాకు చాలా ముఖ్యమైన మహిష్మతి చక్రవర్తి పట్టాభిషేకం సీన్. వాస్తవానికి ‘బాహుబలి: ది బిగినింగ్’ సినిమా చూసినవాళ్లకి మహిష్మతి చక్రవర్తి ఎవరనే విషయంపై స్పష్టత ఉంది. రాజమాత శివగామి చెప్పిన దాన్ని బట్టి అమరేంద్ర బాహుబలే చక్రవర్తి కావాలి.

కానీ తాజాగా లీకైన 1.38 నిమిషాల ‘బాహుబలి 2’ సన్నివేశాలను చూస్తే.. భళ్లాలదేవ చక్రవర్తిగా పట్టాభిషిక్తుడు అయ్యాడు. మహిష్మతి రాజ్య సేనాధిపతిగా బాహుబలి స్వయంగా భళ్లాలదేవుడిని సింహాసనం వద్దకు తీసుకెళ్తున్న సన్నివేశాలు ప్రస్తుతం ఆన్‌లైన్‌లో చక్కర్లు కొడుతున్నాయి. దీనిని బట్టి చూస్తే ప్రేక్షకులు ఊహించినదానికి భిన్నంగా ‘బాహుబలి 2’ కథ ఉండబోతున్నట్లు అర్థమవుతోంది. భళ్లాలదేవుడు చక్రవర్తి అయ్యాడు కాబట్టే.. ఆయన ఆదేశాల మేరకు కట్టప్ప బాహుబలిని చంపి ఉండొచ్చు. ఏదేమైనా ఆన్‌లైన్‌లో లీకైన ఈ సీన్ సినిమాపై మరింత ఉత్కంఠను పెంచేస్తోంది.