బాహుబలి 2 ను మొదట చూసేది క్వీన్ ఎలిజబెత్?

ఈ ఏడాది ఎప్పుడెప్పుడు విడుదలవుతుందా అని సినీ ప్రేమికులంతా ఎదురు చూస్తున్న సినిమా ‘బాహుబలి: ద కన్ క్లూజన్’. రాజమౌళి చెప్పిన దాని ప్రకారం బాహుబలి2 ఈ ఏడాది ఏప్రిల్ 28న విడుదలవుతుంది. అయితే ఈ సినిమా మనమందరం చూసే కన్నా ముందే ఓ ప్రపంచ ప్రముఖురాలు మొదట ఆ సినిమా చూసే అవకాశం ఉందట. ఆమె ఎవరో కాదు... బ్రిటన్ రాణి ఎలిజబెత్ 2. బ్రిటన్‌లోని బకింగ్ హామ్ ప్యాలెస్ లో ఏప్రిల్ 27న ఈ సినిమాను ప్రదర్శించనున్నారని సమాచారం. 70 ఏళ్ల భారత స్వాతంత్య్రాన్ని పురస్కరించుకుని యూకే - ఇండియన్ ప్రభుత్వాలు సాంస్కృతిక కార్యక్రమాలను చేపట్టాయి. సోమవారమే క్వీన్ ఎలిజబెత్ ఆ వేడుకను ప్రారంభించింది. కాగా బ్రిటిష్ ఫిల్మ్ ఇన్‌స్టిట్యూట్ వాళ్లు ఈ సందర్భంగా భారతీయ సినిమాలపై ప్రత్యేక కార్యక్రమాన్ని ఏర్పాటు చేయనున్నారు. ఏప్రిల్ నుంచి డిసెంబర్ నెల వరకు పలు భారతీయ సినియాలను ప్రదర్శించనున్నారు. అందులోనే బాహుబలి2 ను కూడా ప్రదర్శించనున్నట్టు తెలుస్తోంది. కనుక ఆ వేడుకలో క్వీన్ ఎలిజబెత్ బాహుబలి చూసే అవకాశం కూడా ఉందంటున్నారు సినీ విశ్లేషకులు.

ఇక సోమవారం బకింగ్ హామ్ ప్యాలెస్‌లో ప్రారంభమైన యూకే-ఇండియన్ కల్చరల్ కార్యక్రమాలకి మనదేశం ప్రతినిధిగా కేంద్ర ఆర్థిక మంత్రి అరుణ్ జైట్లీ హాజరయ్యారు. ప్రత్యేక ఆహ్వానంపై కమల్ హాసన్, సురేష్ గోపి, కపిల్ దేవ్, మనీష్ అరోరా, మనీష్ మల్హోత్రా, అనౌష్క శంకర్, గుర్దాస్ మన్ తదితరులు పాల్గొన్నారు.