తెలుగు రాష్ట్రాల్లో ‘బాహుబలి 2’ వసూళ్ల వరద!

ప్రపంచవ్యాప్తంగా దాదాపు ఆరు వేల థియేటర్లలో విడుదలయిన ‘బాహుబలి 2: ది కన్‌క్లూజన్’ వసూళ్లలో ప్రభంజనం సృష్టిస్తోంది. విడుదలైన మొదటి వీకెండ్‌లో భారీ వసూళ్లను రాబట్టింది. ఆంధ్రప్రదేశ్, తెలంగాణ రాష్ట్రాల్లో మొదటి మూడు రోజుల్లో ఏకంగా రూ. 74 కోట్ల 30 లక్షల షేర్ సాధించింది. మేడే సందర్భంగా ఈరోజు సెలవు దినం కాబట్టి వసూళ్లు మరింత పెరిగే అవకాశముందని అంచనా వేస్తున్నారు.

మొదటి మూడు రోజుల్లో నైజాంలో రూ. 19 కోట్లు, సీడెడ్‌లో రూ. 12.50 కోట్లు వసూలయ్యాయి. ఇక ఈస్ట్‌లో రూ. 8.72 కోట్లు, వెస్ట్‌లో రూ. 7.51 కోట్లు, గుంటూరులో రూ. 8.84 కోట్లు, ఉత్తరాంధ్రలో రూ. 9.28 కోట్లు, నెల్లూరులో రూ. 3.20 కోట్లు, కృష్టాలో రూ. 5.25 కోట్లు ఇలా ప్రాంతాల వారీగా మొత్తం కలిసి రూ. 74.30 కోట్ల షేర్‌ను ‘బాహుబలి 2’ వసూలు చేసింది. తెలుగు రాష్ట్రాల్లోనే కాకుండా ఇతర దేశాల్లో కూడా ఈ సినిమా చరిత్ర సృష్టిస్తోంది.

దీని దూకుడు చూస్తుంటే కచ్చితంగా ఆమిర్ ఖాన్ సూపర్‌హిట్ మూవీ ‘పీకే’ బద్దలు కొట్టేలా కనిపిస్తోంది. కాగా, ఎస్ఎస్ రాజమౌళి తెరకెక్కించిన ఈ విజువల్ వండర్ ప్రపంచ వ్యాప్తంగా మూడు రోజుల్లో రూ. 500 కోట్లకు పైగా గ్రాస్ వసూలు చేసినట్లు తెలుస్తోంది. కేవలం భారత్‌లోనే రూ. 385 కోట్ల గ్రాస్ రాబట్టిందట. ఇక విదేశాల్లో రూ. 121 కోట్లను బాక్సాఫీసును కొల్లగొట్టినట్లు సమాచారం.