మనోహరీ!! బాహుబలి భామలతో మోహన్ బాబు

కలెక్షన్ కింగ్ మోహన్ బాబు హీరోగా నటించి చాలా కాలమే అయ్యింది. అల్లరి నరేష్‌తో కలిసి 'మామ మంచు అల్లుడు కంచు' సినిమాలో నటించారు. ఆ తరువాత ఆయన నుండి మరే సినిమా రాలేదు. తాజాగా దర్శకుడు మధన్ చెప్పిన కథ ఆయనకు నచ్చడంతో 'గాయత్రి' అనే సినిమాలో నటిస్తున్నాడు. జులైలో ఈ సినిమాను పట్టాలెక్కింది. ప్రస్తుతం తిరుపతిలో ప్రత్యేకంగా ఏర్పాటు చేసిన సెట్‌లో ఈ సినిమాకు సంబంధించిన స్పెషల్ సాంగ్‌ను చిత్రీకరిస్తున్నారు.

స్కార్లెట్ విల్సన్, మధు స్నేహలతో కలిసి మోహన్ బాబు ఈ పాటలో స్టెప్పులేసినట్లుగా తెలుస్తోంది. గతంలో స్కార్లెట్, మధులు కలిసి బాహుబలి ది బిగినింగ్ సినిమాలో ప్రభాస్‌తో 'మనోహరీ..' స్పెషల్ సాంగ్‌లో నర్తించారు. ఆ పాట కూడా బాగా పాపులర్ అయింది. ఇప్పుడు మోహన్ బాబు సినిమా కోసం ఈ ఇద్దరు ముద్దుగుమ్మలను రంగంలోకి దింపారు. చాలా కాలం తరువాత ఈ సినిమాలో మోహన్ బాబు ఐటమ్ భామలతో ఆడిపాడనున్నారు. ఈ సినిమా మోహన్ బాబుతోపాటు అతడి పెద్ద కుమారుడు మంచు విష్ణు ఓ ముఖ్య పాత్ర పోషించనున్నారు. అలానే యాంకర్ అనసూయ జర్నలిస్ట్ పాత్ర పోషించనుంది. వచ్చే ఏడాది ఈ సినిమా ప్రేక్షకుల ముందుకు రానుంది.