బాహుబలి2 ఆడియో హోస్ట్‌గా యంగ్ హీరో!

బాహుబలి2 గురించి వస్తోన్న ప్రతి వార్త సినిమాపై ఆసక్తిని మరింత పెంచేస్తున్నాయ్. ఈ సినిమా ఆడియో విడుదల కార్యక్రమం ఈ నెల 26న హైదరాబాద్‌లోని రామోజీ ఫిల్మ్ సిటీలో నిర్వహించనున్నారు. దీనికి సంబంధించిన ప్రతి విషయంలోనూ ఎన్నో జాగ్రత్తలు తీసుకుంటున్నారు.

ఈ వేడుకకు సౌత్‌తో పాటు నార్త్ ఇలా అన్ని సినీ పరిశ్రమల నుండి టాప్ సెలబ్రిటీలు హాజరు కానున్నారు. కాబట్టి ఈ ఈవెంట్ హోస్టింగ్ విషయంలో కూడా రాజమౌళి స్పెషల్ కేర్ తీసుకోబోతున్నాడు. తాజాగా ఈ విషయమై రాజమౌళి యంగ్ హీరో నానితో చర్చించి ఈవెంట్‌కు హోస్ట్‌గా తనను వ్యవహరించమని అడిగారట.

నానికి, రాజమౌళికి ఉన్న అనుబంధం గురించి ప్రత్యేకంగా చెప్పనక్కర్లేదు. ఈగ సినిమాతో నాని మాంచి హిట్ ఇచ్చిన జక్కన్న ఇటీవల తన కోసం 'మజ్ను' సినిమాలో గెస్ట్‌గా కూడా కనిపించాడు. వారిద్దరి మధ్య ఉన్న అనుబంధం అలాంటిది. దీంతో రాజమౌళి అడిగిన వెంటనే నాని కాదనలేకపోయాడు. వెంటనే ఓకే చెప్పేశాడట.

దీంతో సీనియర్ యాంకర్ సుమతో కలిసి నాని స్టేజ్ షేర్ చేసుకోబోతున్నాడు. సినిమాలో మొత్తం ఆరు పాటలున్నాయి. పాటలతో పాటు నాని యాంకరింగ్ ఆడియో రిలీజ్ ఫంక్షన్‌కు హైలైట్ అవుతుందని యూనిట్ భావిస్తుంది.