అరె!! బాలయ్యా లవ్ ఫెయిల్యూర్ ఏందయ్యా!

నందమూరి బాలకృష్ణ హీరోగా కె.ఎస్.రవికుమార్ దర్శకత్వంలో ఓ సినిమా రూపొందుతోన్న సంగతి తెలిసిందే. ఈ సినిమాలో బాలయ్య సరసన నయనతార హీరోయిన్‌గా కనిపించనుంది. అయితే ఈ సినిమాకు సంబంధించిన ఓ ఆసక్తికర విషయం వెలుగులోకి వచ్చింది. ఈ సినిమాలో బాలయ్య బ్రహ్మచారిగా కనిపించబోతున్నాడట. నలభై ఏళ్ళు దాటుతున్నా పెళ్లి చేసుకొని బ్రహ్మచారిగా బాలయ్య పాత్రను డిజైన్ చేసినట్లు తెలుస్తోంది.

ప్రాణానికి ప్రాణంగా ప్రేమించిన అమ్మాయి మరొకరిని పెళ్లి చేసుకొని వెళ్లిపోవడంతో ఆమె జ్ఞాపకాలతో జీవితాన్ని గడిపే వ్యక్తి పాత్రలో బాలయ్య కనిపిస్తాడని తెలుస్తోంది. మరొకరిని పెళ్లి చేసుకున్న ఆమె కొద్ది కాలానికి తిరిగి ప్రేమించిన వ్యక్తి జీవితంలోకి ప్రవేశిస్తే ఎలాంటి సంఘటనలు చోటు చేసుకున్నాయనే కథతో ఈ సినిమాను రూపొందిస్తున్నారు. ప్రస్తుతం ఈ సినిమా షూటింగ్ కుంభకోణంలో జరుగుతోంది. అక్కడ దాదాపు 28 రోజుల పాటు చిత్రీకరణ జరపనున్నారు. ఈ సినిమాను సంక్రాంతి కానుకగా ప్రేక్షకుల ముందుకు తీసుకురావడానికి సన్నాహాలు చేస్తున్నారు. దాని తగ్గట్లుగా త్వరగా షూటింగ్ పూర్తి చేయడానికి ప్రయత్నిస్తున్నారు.