బాలయ్య తండ్రిలాంటి వారు: నయన్

బాలకృష్ణతో మూడు చిత్రాల్లో కలిసి నటించిన నయనతార ఆయనతో తనకు ఉన్న బంధంపై ఆసక్తికరమైన వ్యాఖ్యలు చేసింది. ఆమె ఓ ఇంటర్వ్యూలో మాట్లాడుతూ... ‘‘బాలయ్యను అంతా సహ నటుడు, హీరోగానే చూస్తారు. కానీ, నేను మాత్రం ఆయన్ను తండ్రిలా భావిస్తాను. ఆయన్ను చూడగానే దణ్ణం పెట్టాలనిపిస్తుంది. ఆయన ఎంతో సౌమ్యుడు. ఆయనతో ఇప్పటి వరకు మూడు సినిమాలు చేశాను. కానీ, ఇప్పటి వరకు నాకు ఆయన నుంచి ఎలాంటి ఇబ్బంది కలగలేదు. ఆయన నన్ను ఎంతో జాగ్రత్తగా, తండ్రిలా చూసుకుంటారు. అందుకే ఆయన్ని నేను మా సొంత కుటుంబ సభ్యుడిగా భావిస్తాను. ఆయనతో నటించడానికి నేనెప్పుడూ సిద్ధమే’’ అని అంది.

నయన్, బాలకృష్ణ జంటగా ‘సింహా, శ్రీరామరాజ్యం’ సినిమాల్లో నటించిన సంగతి తెలిసిందే. మరోసారి వీరిద్దరు ‘జైసింహా’తో జతకట్టారు. ఈ సినిమా జనవరి 12న విడుదల కానుంది.