స్టేజ్‌పై స్టంట్లు.. అదరగొట్టిన బాలయ్య!

నందమూరి నటసింహం బాల‌కృష్ణ‌ సినిమాల్లో ఫైట్లకు చాలా ప్రత్యేకత ఉంటుంది. బాలయ్య సినిమాల్లో ఫైట్లకు పెద్ద ఫ్యాన్ ఫాలోయింగ్ ఉంది. అలా తెరపైనే కాదు, ఆఫ్ స్క్రీన్‌లో కూడా స్టంట్స్ విషయంలో తన ప్రత్యేకత తనదే అని బాలయ్య నిరూపించుకున్నాడు. స్టంట్స్‌కు సంబంధించి బాలయ్య లైవ్ ప్రదర్శనే ఇచ్చాడు. స్టేజీమీద చుట్టుముట్టిన రౌడీలను తన ఫైట్‌తో చెదరగొట్టేసింది నందమూరి నటసింహం. ఇదంతా స్టంట్స్ ఆర్టిస్ట్స్ అసోసియేషన్ గోల్డెన్ జూబ్లీ సెలబ్రేషన్స్ కార్యక్రమంలో జరిగింది.

చెన్నైలో ఇటీవల జరిగిన ఆ కార్యక్రమానికి పలువురు దక్షిణాది స్టార్ హీరోలు పాల్గొన్నారు. అలా పాల్గొని స్టంట్స్ ఆర్టిస్ట్స్ ను అభినందించిన వాళ్లలో బాలయ్య కూడా ఒకరు. ఈ కార్యక్రమంలో బాలయ్య స్టేజ్ మీద ప్రదర్శన కూడా ఇచ్చారు. అచ్చం సినిమాల్లో చేసినట్టుగానే ఫైట్ చేసి.. బాలయ్య ఆకట్టుకున్నాడు. ఫైట్ ను ముగించి బాలయ్య తనదైన శైలిలో తొడకొట్టే సరికి కార్యక్రమ వేదిక చప్పట్లతో, విజిల్స్ తో మార్మోగింది.

ఈ కార్యక్రమంలో బాలయ్య తమిళంలో మాట్లాడటం గమనార్హం. తను చెన్నైలోనే పుట్టానని, ఆ మట్టి మీదే పెరిగానని అన్నారాయన. స్టంట్స్ ఆర్టిస్ట్స్ అసోసియేషన్ 50 సంవత్సరాల వేడుకకు తను హాజరు అయ్యానని, ఈ సంస్థ 75 సంవత్సరాల వేడుకకు తన తనయుడు హాజరవుతాడని, ఈ సంస్థ వందేళ్లను పూర్తి చేసుకున్న సమయానికి తన మనవడు అతిథిగా హాజరవుతాడని బాలయ్య వ్యాఖ్యానించడం గమనార్హం.

తమిళ సూపర్ స్టార్ రజనీకాంత్, సీనియర్ నటులు భాగ్యరాజా, శివకుమార్, హీరోలు సూర్య, విశాల్, శివకార్తికేయన్ తదితరులు ఈ కార్యక్రమంలో పాల్గొన్నారు.