వాళ్లని కలిసి మాట్లాడాకే నాన్న గారి బయోపిక్ -బాలయ్య

స్వ‌ర్గీయ నంద‌మూరి తార‌క రామారావు రియల్ స్టోరీ ఆధారంగా ఓ సినిమా చేస్తాన‌ని గతంలో ప్రకటించిన బాల‌య్య బాబు ఆ తర్వాత సైలెంట్‌గా వుండటంపై అటు మీడియాలో ఇటు సినీవర్గాల్లో పలు సందేహాలు వ్యక్తమయ్యాయి. ప్రకటన చేసిన తర్వాత మళ్లీ ప్రాజెక్టుకి సంబంధించిన విషయాలేవీ వెలుగుచూడకపోవడంతో ఎన్టీఆర్ బయోపిక్ ఏమైంది అనే టాక్ మొదలైంది.

ఆనోటాఈనోటా ఈ సందేహాల గురించి తెలుసుకున్న బాలయ్య బాబు ఎన్టీఆర్ బయోపిక్ తప్పకుండా వుంటుంది అని పోర్చుగల్ నుంచే క్లారిటీ ఇచ్చినట్టు తెలుస్తోంది. ప్రస్తుతం తన 101వ సినిమా పైసా వసూల్ కోసం పోర్చుగల్‌లో జరుగుతున్న షూటింగ్‌లో పాల్గొంటున్నారు బాలయ్య. పైసా వసూల్ షూటింగ్ పూర్తి చేసుకుని ఇండియా వచ్చిన తర్వాత నాన్న గారి సినిమాపై దృష్టి సారిస్తా అని బాలకృష్ణ చెప్పినట్టు సమాచారం. ఎన్టీఆర్ గురించి బయటి ప్రపంచానికి తెలియ‌ని చాలా విష‌యాల‌ను ఈ సినిమా ద్వారా తెలుగు వారికి తెలియజేయాలనుకుంటున్నారట బాలయ్య బాబు.

అందుకోసం ఎన్టీఆర్ వద్ద ఓఎస్డీగా పనిచేసిన ఐఏఎస్ అధికారి లక్ష్మీనారాయణ, ఎన్టీఆర్‌తో కలిసి పనిచేసిన ఐఏఎస్ అధికారి జయప్రకాష్ నారాయణ, ఎన్టీఆర్ సినీ, రాజకీయ జీవితం గురించి పూర్తిగా తెలిసిన కొమ్మినేని వెంకటేశ్వరరావు లాంటి వాళ్లను సంప్రదించి, వారి వద్ద సేకరించిన విశేషాల ఆధారంగానే ఎన్టీఆర్ బయోపిక్‌కి అవసరమైన స్క్రిప్ట్ రూపొందించడం జరుగుతుందని.... ఆ తర్వాతే డైరెక్టర్ కూడా ఫైనల్ అవుతారని బాలయ్య బాబు చెప్పినట్టు సమాచారం.