తామిద్దరం ప్రేమలో ఉన్నామని ఆ మధ్య ప్రకటించుకున్నారు తమిళనటుడు జై, నటీమణి అంజలి. ఈ తెలుగమ్మాయి తమిళంలో బిజీ నటిగా ఉన్న సంగతి తెలిసిందే. ఇదే సమయంలో జైతో ప్రేమలో పడిందీమె. కలిసి నటించిన వీళ్లిద్దరూ ప్రేమలో ఉన్నట్టుగా ప్రకటించుకున్నారు. ప్రేమలో ఉండటమే గాక.. వీళ్లు సహజీవనం కూడా చేస్తున్నారని టాక్.
ఇప్పుడు ఈ సహజీవనం ఆసక్తిదాయకమైన రీతిలో వార్తల్లోకి వచ్చింది. తాజాగా తమిళ సినీ ఇండస్ట్రీ పెద్దల వద్ద ఆసక్తిదాయకమైన ఫిర్యాదు నమోదైంది. అదేమిటంటే.. జై షూటింగుకు సరిగా రావడం లేదని, అతడు షూటింగుకు తరచూ డుమ్మా కొడుతుండటంతో తమకు అపారమైన నష్టం వాటిళ్లుతోందని ఒక సినీ నిర్మాత ఫిర్యాదు చేశాడు.
ప్రస్తుతం జై ‘బెలూన్’ అనే సినిమాలో నటిస్తున్నాడు. ఆ సినీ నిర్మాత ఈ ఫిర్యాదు చేశాడు. ఇందులో అంజలి పేరు కూడా మిళితం అయి ఉండటం విశేషం. అంజలికి ఆరోగ్యం బావుండటం లేదు అనే రీజన్ చెప్పి సినిమా షూటింగుకు డుమ్మా కొడుతున్నాడట జై. అతడు రోజుల తరబడి షూటింగ్ కు రాకపోవడంతో.. నష్టం కోట్లలోకి చేరిపోయిందని నిర్మాత అంటున్నాడు. అంజలి పేరుతో అతడు షూటింగుల నుంచి సెలవు తీసుకుంటున్నాడని.. వాస్తవానికి అంజలికి ఏమీ కాలేదని.. ఆమె ఆరోగ్యంగానే ఉందని నిర్మాత చెబుతున్నాడు. ఈ నేపథ్యంలో జై పై చర్యలు కోరుతూ ఈ ఫిర్యాదు నమోదైంది. ఇలా అంజలి, జై ల ప్రేమకథ చర్చనీయాంశంగా మారింది.