‘పవర్’ హీరోతో పవన్ భక్తుడు!

పవర్ స్టార్ పవన్ కళ్యాణ్ భక్తుడు అనగానే మనకు వెంటనే గుర్తుకు వచ్చేది టాలీవుడ్ ఒకప్పటి టాప్ ప్రొడ్యుసర్ బండ్ల గణేష్. ఈ మధ్యకాలంలో సినిమాలకు దూరంగా ఉన్న బడా నిర్మాత బండ్ల గణేష్ మళ్లీ ఓ క్రేజీ ప్రాజెక్ట్‌ను తెరకెక్కించేందుకు రెడీ అవుతున్నారు. అసలుకథకొస్తే.. ఒకప్పటి స్టార్ డైరెక్టర్ శ్రీనువైట్లకు గత కొంత కాలంగా సరైన హిట్టు సినిమా పడలేదు. అయినా తన ప్రయత్నాన్ని మాత్రం విడిచిపెట్టడం లేదు. ఓ లైన్ అనుకొని రవితేజకు వినిపించాడు. కథ సిద్ధం చేసుకోమని చెప్పడంతో సినిమాను నిర్మించడానికి మైత్రి మూవీ మేకర్స్ వారు ముందుకు వచ్చారు. అయితే శ్రీనువైట్ల బడ్జెట్ కాస్త ఎక్కువ చెప్పడంతో ప్రస్తుతం ఆయనకు డిమాండ్ లేకపోవడంతో ఆలోచనలో పడ్డ సదరు నిర్మాణ సంస్థ ఈ ప్రాజెక్ట్ నుండి తప్పుకోవాలని భావిస్తోందట.

మొదట తక్కువ బడ్జెట్ అని చెప్పి తరువాత ఆ పరిధిని వైట్ల దాటేస్తుంటాడని వైట్ల గురించి కొందరు నిర్మాతలు చెబుతుంటారు. మొత్తంగా చూసుకుంటే ఈ సినిమాకు కనీసం ముప్పై కోట్లు ఖర్చవుతుందట. దీంతో మైత్రి మూవీ మేకర్స్ వారు ఈ ప్రాజెక్ట్ విషయంలో వెనుకడుగు వేస్తున్నారు. ఇక చాలా రోజులుగా రవితేజతో కలిసి సినిమా చేయాలనుకుంటోన్న నిర్మాత బండ్ల గణేష్ ఈ సినిమా కోసం రంగంలోకి దిగినట్లుగా తెలుస్తోంది. భారీ చిత్రాలను తెరకెక్కించిన బండ్ల గణేష్ కొంత కాలంగా సినిమాలకు దూరంగా ఉంటున్నారు. ఇక త్వరలోనే సినిమా నిర్మాణాన్ని మొదలుపెట్టాలని నిర్ణయించుకున్నాడు. దీంతో రవితేజను హీరోగా పెట్టి సినిమా చేయాలనుకుంటున్నాడు. ఎలాగో రవితేజ.. శ్రీనువైట్ల కథకు ఓకే చెప్పడంతో ఆ సినిమాను తన బ్యానర్ లో నిర్మించే విధంగా ప్లాన్ చేస్తున్నాడు ఈ స్టార్ ప్రొడ్యూసర్. త్వరలోనే ఈ విషయానికి సంబంధించి అధికార ప్రకటన వెలువడనుంది.