భళా.. ‘బాహుబలి-2’.. బీబీసీ న్యూస్!

దర్శకధీరుడు రాజమౌళి.. అద్భుతంగా తెరకెక్కించిన ‘బాహుబలి-2’ సినిమా తెలుగోడి సత్తాను ప్రపంచానికి చాటి చెప్పిన విషయం తెలిసిందే. రిలీజైన నాటి నుంచి రికార్డులన్నింటినీ కొల్లగొడుతూ దూసుకెళుతున్న ఈ చిత్రంపై పలువురు ప్రముఖులు ప్రశంసలు కురిపిస్తున్నారు. తాజాగా మోస్ట్ పాపులర్ న్యూస్ చానల్ ‘బీబీసీ’ కూడా ‘బాహుబలి-2’ సినిమా జైత్రయాత్ర గురించి ఓ వార్తా కథనాన్ని ప్రసారం చేసింది. హైదరాబాద్ నగరంలో, ఓ ప్రాంతీయ భాష ‘తెలుగు’లో.. రూపుదిద్దుకున్న ఈ సినిమా ప్రపంచవ్యాప్తంగా అందర్నీ ఆకట్టుకుంటోందని బీబీసీ న్యూస్‌లో పేర్కొన్నారు. ఫ్యాంటసీ కథతో, అద్భుత సన్నివేశాలతో తీర్చిదిద్దిన బాహుబలి-2 ప్రపంచవ్యాప్తంగా ప్రేక్షకులను మంత్రముగ్ధుల్ని చేస్తోందని వాళ్లు కితాబిచ్చారు.

ఈ సినిమాలో విజువల్ ఎఫెక్ట్స్‌ను ఉపయోగించుకున్న తీరు అద్భుతమని, ఆసక్తికర కథకు ఉత్కంఠను పెంచే స్రీన్ ప్లే తోడై ఆద్యంతం అలరిస్తోందని బీబీసీ న్యూస్ పేర్కొంది. యూఎస్, యూకే లాంటి దేశాల్లోనూ అదరగొడుతూ కలెక్షన్ల సునామీ సృష్టిస్తోందని బీబీసీ ప్రశంసించింది. దీంతో పాటు దర్శకుడు రాజమౌళి, కథానాయిక అనుష్క ఇచ్చిన ఇంటర్వ్యూ క్లిప్పింగును కూడా వేశారు.

నటనకు సంబంధించి వచ్చిన ప్రస్తావన సందర్భంగా.. ‘ఇండియాలో ఇంత గొప్ప నటులు ఉన్నప్పటికీ.. హాలీవుడ్‌ హీరోల మాదిరిగా వాళ్లు ఎందుకు పేరు సంపాదించుకోలేక పోతున్నారు?’ అని రాజమౌళిని ప్రశ్నించారు. దీనికి ఆయన బదులిస్తూ.. ‘భారత్‌లో పురాణ కథల్లోనే గొప్ప హీరోలు ఉన్నారు. కానీ, చాలా మంది పాశ్చాత్య కథలను అనుకరించడం వల్ల సరైన గుర్తింపు రావట్లేదు. వాటిని అనుకరించడం తప్పేమీ కాదు. అయితే మన సంస్కృతిపై కూడా దృష్టి సారించాలి. ఇక్కడి ఇతిహాస కథల ఆధారంగా మరింత బలమైన సినిమాలను తెరకెక్కించవచ్చు. బాహుబలి ద్వారా చేసింది చాలా తక్కువే’ అని వ్యాఖ్యానించారు.