బ్రోతల్ ఓనర్‌గా విద్యాబాలన్ విశ్వరూపం!

‘డర్టీపిక్చర్’ సినిమాతో తనలోని రెండోకోణాన్ని బయటపెట్టి విలక్షణనటిగా గుర్తింపు తెచ్చుకుంది విద్యాబాలన్. ఆమె ప్రధాన పాత్రలో నటిస్తున్న తాజా చిత్రం ‘బేగం జాన్’. దేశ విభజన సమయంలో వేశ్యలుగా మారిన బెంగాలీ మహిళల జీవితం ఇతివృత్తంగా ఈ సినిమా రూపొందుతోంది. బెంగాలీ సినిమా ‘రాజ్‌కహిని’ ఆధారంగా శ్రీజిత్‌ ముఖర్జీ హిందీలో తెరకెక్కిస్తున్నారు. ఆ సినిమాలో ప్రధాన పాత్ర అయిన బేగం జాన్ అనే మహిళ బ్రోతల్ హౌస్‌ను నడుపుతుంది. అదే పేరును హిందీలో సినిమా టైటిల్‌గా వాడుకున్నారు. బేగం జాన్ పాత్రలో విద్యాబాలన్ మరోసారి తన విశ్వరూపాన్ని చూపించనుంది. ఈ నేపథ్యంలో విద్యాబాలన్ అభిమానులు ఎప్పుడెప్పుడా అని ఎదురుచూస్తున్న ‘బేగం జాన్’ ట్రైలర్ మంగళవారం విడుదలైంది.

ఫస్ట్ లుక్‌తోనే అభిమానులను కట్టిపడేసిన విద్యాబాలన్.. ట్రైలర్‌తో సినిమాపై అంచనాలను మరింత పెంచేసింది. అమితాబ్ బచ్చన్ వాయిస్ ఓవర్‌తో మొదలైన ఈ ట్రైలర్‌ అప్పటి వేశ్యల పరిస్థితిని కళ్లకు కట్టింది. ట్రైలర్‌లోనే ఇంత డెప్త్ ఉంటే ఇక సినిమా ఎలా ఉంటుందో అని ఆలోచించకమానం. యదార్థ సంఘనల ఆధారంగా తెరకెక్కుతున్న ఈ సినిమాలో నజీరుద్దిన్ షా, ఆశిష్ విద్యార్థి, గౌహర్ ఖాన్, రజిత్ కపూర్ తదితరులు నటిస్తున్నారు. ప్రముఖ సంగీత దర్శకుడు అను మాలిక్ స్వరాలు అందించారు. ఈ సినిమా ఏప్రిల్ 14న ప్రపంచ వ్యాప్తంగా విడుదలవుతుంది.