Varun Dhawan: భేడియా ట్విట్టర్ రివ్యూ.. మూవీ ఎలా ఉందంటే?

Bhediya Twitter Review:: బాలీవుడ్ హీరో వరుణ్ ధావన్ (Varun Dhawan), కృతి సనన్ (Kriti Sanon) జంటగా నటించిన భేడియా (Bhediya) సినిమా తెలుగులో తోడేలు పేరుతో ఈరోజు రిలీజైంది. ఈ సినిమాని విదేశాల్లో ఇప్పటికే చూసేసిన కొందరు ప్రేక్షకులు మూవీ ఎలా ఉంది? అనే విషయాన్ని ట్విట్టర్‌ ద్వారా పంచుకుంటున్నారు. తోడేలు కాటుకి గురైన మనిషి.. తోడేలుగా మారిపోతే? అనే చిన్న లైన్‌ని తీసుకున్న దర్శకుడు అమర్ కౌశిక్ (Amar Kaushik) ప్రేక్షకుల్ని మెప్పించాడా? వరుణ్ ధావన్ నటన ఎలా ఉంది? కృతి సనన్‌ ఎలా చేసింది? ఇతర నటులు, బీజీఎం వర్క్ తదితర విషయాల్ని నెటిజన్లు పంచుకుంటున్నారు.
ఈ మూవీలో వరుణ్ ధావన్, కృతి సనన్, అభిషేక్ బెనర్జీ, దీపక్ డోబ్రియాల్ తదితరులు నటించారు. హారర్, ఫిక్షన్ డ్రామాగా తెరకెక్కిన ఈ మూవీలో వరుణ్ ధావన్ చక్కగా నటించినట్లు నెటిజన్లు చెప్తున్నారు. మరీ ముఖ్యంగా.. తోడేలుగా తన హావభావాలతో కట్టిపడేసినట్లు ట్వీట్స్ ద్వారా అర్థమవుతోంది. కానీ.. కృతి ససన్ విషయంలో కాస్త నెగటివ్‌గా స్పందిస్తున్నారు. నటన పరంగా ఆమెకి పెద్దగా స్కోప్ దొరకలేదని.. వరున్ ధావన్‌కి ఫ్రెండ్స్‌ నటించిన వాళ్లు కూడా అతని ముందు తేలిపోయినట్లు చెప్తున్నారు. కామెడీ ట్రాక్స్ బాగున్నా.. పూర్తిగా మెప్పించలేకపోయిందట.


దీపక్ డోబ్రియాల్‌ పాత్ర నిడివి చాలా తక్కువ ఉందని.. అయినప్పటికీ స్క్రీన్‌పై కనిపించినంతసేపు అతను బాగా నటించినట్లు నెటిజన్లు కితాబిస్తున్నారు. జిష్ణు భట్టాచార్జీ కెమెరా వర్క్‌కి పెద్ద ఎత్తున ప్రశంసలు లభిస్తున్నాయి. అడవుల్లో కొన్ని సీన్స్ చాలా అద్భుతంగా చిత్రీకరించాడని.. సినిమాకి సినిమాటోగ్రఫీ హైలైట్ అని చెప్తున్నారు. ఓవరాల్‌గా థ్రిల్లింగ్ అంశాలతో కూడిన భేడియా మూవీ ఎలాంటి అంచనాలు లేకుండా థియేటర్‌కి వెళితే ఎంజాయ్ చేయొచ్చని నెటిజన్లు అభిప్రాయపడుతున్నారు.


వాస్తవానికి వరుణ్ ధావన్‌కి ఇలాంటి ప్రయోగాత్మక చిత్రాలు చేయడం కొత్తమీ కాదు. గతంలో ‘బద్లాపూర్’ ‘అక్టోబర్’ లాంటి సినిమాలు చేశాడు. ఆ తర్వాత కమర్షియల్ వైపు వెళ్లిపోయిన ఈ హీరో.. మళ్లీ భేడియాతో ప్రయోగం చేశాడు. మరోవైపు అమర్ కౌశిక్ కూడా గతంలో ‘బాల’, ‘స్త్రీ’ తదితర సినిమాలతో అభిమానుల్ని మెప్పించాడు. కానీ ఆ సినిమాల్ని దృష్టిలో పెట్టుకుని ఈ భేడియాకి వెళితే మాత్రం నిరాశ తప్పదట. బాల, స్త్రీ సిరీస్ తరహాలో ఈ సినిమా కథపై అమర్ కౌశిక్ దృష్టి పెట్టలేదనే విమర్శ కూడా వినిపిస్తోంది.

• Read Latest Telugu Movies News , Telugu News