ఉయ్యాలవాడ.. ఆ స్టార్ హీరోలున్నారు!

పెద్దగా హడావుడి లేకుండా ఆరంభం అయిన మెగాస్టార్ చిరంజీవి 151వ సినిమా ‘ఉయ్యాలవాడ’ విషయంలో బోలెడంత ఆసక్తిదాయకమైన సందేహాలున్నాయి. ఈ సినిమాకు సంబంధించి ఇది వరకూ ఎన్నో ప్రచారాలు జరిగాయి. ఈ సినిమా ఆరంభం కావడంతో.. అధికారికంగా షూటింగ్ మొదలుకావడంతో ఆ సందేహాలన్నింటికీ సమాధానాలు దొరికే సమయం వచ్చింది. ఈ అంశాల గురించి వాకబు చేస్తే ఆసక్తికరమైన విషయాలు తెలిశాయి.

ఈ సినిమాలో ముందుగా ప్రచారం జరిగినట్టుగా అమితాబ్ బచ్చన్ నటించడం దాదాపు ఖాయమే అని తెలుస్తోంది. సినిమాలో ఒక పాత్ర కోసం బిగ్ బిని సంప్రదించిన మాట వాస్తవమే అని, అందుకు సంబంధించి చర్చలు జరుగుతున్నాయని.. అయితే ఆయన అధికారికంగా సైన్ చేయగానే విషయాన్ని అనౌన్స్ చేస్తామని ఈ సినిమాకు సంబంధించిన ఒక సోర్స్ పేర్కొన్నారు. అలాగే ఇందులో కన్నడ స్టార్ హీరో సుదీప్ నటిస్తున్న మాట వాస్తవమే అని పేర్కొన్నారు. ఒక పాత్రలో సుదీప్ కనిపించబోతున్నారని వివరించారు.

తమిళ హీరో విజయ్ సేతుపతి ఈ సినిమాలో నటించడం లేదని స్పష్టం చేశారు. ఆ ప్రచారం అబద్ధమని పేర్కొన్నారు. ఇక సినిమాకు సంగీత దర్శకుడిగా ఏఆర్ రెహమాన్ ఖరారయ్యే అవకాశాలున్నట్టుగా తెలుస్తోంది. అయితే ఇంకా ఖరారు కావాల్సి ఉందని తెలుస్తోంది. ఈ సినిమాను తెలుగుతో పాటు తమిళ, మలయాళ, హిందీ భాషల్లో కూడా భారీ ఎత్తున విడుదల చేయనున్నారు. అందుకు తగ్గ నటీనటులను, టెక్నీషియన్లను తీసుకోనున్నారు. అలాగే హీరోయిన్లుగా బాలీవుడ్ నటి ఐశ్వర్యరాయ్ తో సహా అంతర్జాతీయ ఖ్యాతి కలిగిన ప్రియాంక చోప్రాను కూడా పరిగణనలోకి తీసుకుంటున్నట్టు సమాచారం.