ఆ ప్రేమికుల మధ్య బిత్తిరి సత్తి!

ఒకప్పుడు ఉద్యోగం కోసం చెప్పులరిగేలా తిరిగిన సత్తి... ఇప్పుడు బుల్లితెర హీరో. ఒకే ఒక్క ప్రోగ్రామ్ ‘తీన్మార్ వార్తలు’ తో వీ6 ఛానెల్ రేటింగ్ ను అమాంతం పెంచేస్తున్నాడు. పూల షర్టు, గళ్ల నిక్కరు, వెర్రి చూపులు, నవ్వించే మాటలతో తనకంటూ ప్రత్యేక గుర్తింపు తెచ్చుకున్నాడు. దర్శకులను, హీరోలు ఇంటర్య్వూలు చేస్తూ దూసుకెళ్లిపోతున్నాడు బిత్తిరి సత్తి. ఇప్పుడు అతన్నే కీలక పాత్రగా పెట్టి ఓ సినిమాను నిర్మించారు. అదో టీనేజి లవ్ స్టోరీ. అదేంటీ సత్తిది టీనేజీ కాదే అనుకుంటున్నారా? నిజమే ఆ లవ్ స్టోరీ సత్తిది కాదు... ఓఅమ్మాయి, అబ్బాయిది. వారి మధ్య బిత్తిరి సత్తి పాత్ర. ప్రేమకథలో కామెడీ యాంగిల్ అన్నమాట. ఈ సినిమా పేరు ‘ఇద్దరి మధ్య 18’. నాని ఆచార్య ఈ సినిమాను తీశారు. మరో పదిరోజుల్లో సినిమా విడుదల కానుంది.

ఈ సినిమాను ఇప్పటికే మంత్రి హరీష్ రావుకి చూపించేశారట చిత్రయూనిట్. ఆయన చాలా బాగుందంటూ మెచ్చుకున్నార కూడానట. ఈ సినిమా వినోదాత్మకంగానే కాదు, చాలా కామెడీగా కూడా ఉంటుందని చెబుతున్నారు. యువతను ఆకట్టుకునేలా సినిమాను నిర్మించినట్టు చెప్పారు. ముఖ్యంగా బిత్తిరి సత్తి పాత్ర... సూపరట. కాస్త కొత్తగా ఆయనతో కామెడీ చేయించారట. అది అందరికీ నచ్చుతుందని చెబుతున్నారు చిత్ర దర్శకనిర్మాతలు. అసలు సినిమాకు బిత్తిరి సత్తే హైలైట్ అంటున్నారు. ఈ సినిమాగాని మంచి పేరు కొట్టిందో... ఇక బిత్తిరి సత్తికి సినిమా అవకాశాలు వెల్లువలా పడతాయి.

బిత్తిరి సత్తి ఇప్పటికే బుల్లితెర హీరోలా మారిపోయాడు. ఈ మధ్యన ప్రత్యేక కార్యక్రమాలకు కూడా హాజరవుతున్నాడు. బిత్తిరి సత్తి అసలు పేరు రవికుమార్. రంగారెడ్డి జిల్లాకు చెందిన వారు.