శ్రీదేవి మృతిపై సుబ్రహ్మణ్యస్వామి సంచలన వ్యాఖ్యలు

శ్రీదేవి మృతిపై సస్సెన్స్ కొనసాగుతుంటే... బీజేపీ నేత సుబ్రహ్మణ్య స్వామి చేసిన వ్యాఖ్యలు సంచలనంగా మారాయి. శ్రీదేవి మరణంపై తనకు అనుమానాలు ఉన్నాయన్నారు స్వామి. ఫోరెన్సిక్ రిపోర్ట్‌పై కూడా కొన్ని డౌట్లు వస్తున్నాయని... అసలు ఆమె గుండెపోటుతో చనిపోయిందని ముందు వైద్యులు ఎందుకు ప్రకటించారని ప్రశ్నించారు. ఇప్పటి వరకు హోటల్ సీసీ కెమెరా ఫుటేజ్‌ను ఎందుకు బయటపెట్టలేదన్నారు. తనకు తెలిసి ఆమెకు మద్యం అలవాటు లేదని... బలవంతంగా ఎవరైనా తాగించారనే అనుమానాలు కలుగుతున్నాయన్నారు స్వామి.

శ్రీదేవిని హత్య చేసి ఉంటారని తనకు అనుమానం కూడా ఉందన్నారు. బాత్‌టబ్‌లో పడి చనిపోవడం అంత సులభం కాదని.. ఎవరో బలవంతంగా నీటిలో ముంచితే తప్ప చనిపోలేరని ఆయన అనుమానాలు వ్యక్తం చేశారు. ​ సినీతారలతో దావూద్‌కు ఉన్న సంబంధాలను కూడా బయటపెట్టాలన్నారు. స్వామి మాత్రమే కాదు బంగ్లాదేశ్‌కు చెందిన ప్రముఖ రచయిత్రి తస్లీమా నస్రీన్‌ కూడా శ్రీదేవి మృతిపై వ్యాఖ్యలు చేశారు. ఇది హత్య, ఆత్మహత్య లాంటిది కాకూడదని కోరుకుంటున్నాను అని ట్వీట్‌ చేశారు.