కృష్ణ జింకలను నేను చంపలేదు: సల్మాన్

కృష్ణ జింకల వేట కేసులో అభియోగాలు ఎదుర్కొంటున్న బాలీవుడ్ నటుడు సల్మాన్ శుక్రవారం జోధ్‌పూర్ కోర్టులో తన వాదనలు వినిపించారు. తాను కృష్ణ జింకలను వేటాడలేదని, అవి సహజంగానే మరణించాయని సల్మాన్ న్యాయస్థానానికి తెలిపారు. డాక్టర్ నేపాలియా ఇచ్చిన తొలి ఫోరెన్సిక్ నివేదికలో వెల్లడైనట్లుగా అవి సహజ కారణాలతో మరణించాయని, మిగతా ఆధారాలన్నీ తప్పుడువేనని ఆయన వాదించారు. జోధ్‌పూర్ మెజిస్ట్రేట్ 65 ప్రశ్నలు అడగ్గా వాటిలో చాలా ప్రశ్నలకు ఆయన ‘తప్పు’ అని సమాధానం ఇచ్చారు. ఇప్పటి వరకూ సల్మాన్‌పై వచ్చిన ఆరోపణలు, కేసు విచారణలో భాగంగా నమోదైన వివరాలపైనే మెజిస్ట్రేట్ ప్రశ్నలు అడిగారు.

మీరు కృష్ణ జింకలను చంపుతుండగా చూశామని ఇద్దరు వ్యక్తులు చెబుతున్నారు కదా అని మెజిస్ట్రేట్ దలపత్ సింగ్ రాజ్‌పురోహిత్ ప్రశ్నించగా.. అది తప్పుడు ఆరోపణ అని సల్మాన్ బదులిచ్చారు. మీ జీపుకి రక్తం మరకలు అంటడంతోపాటు, కృష్ణ జింకల వెంట్రుకలు కూడా అతుక్కొని ఉండటాన్ని కూడా గుర్తించారు కదా అని ప్రశ్నించగా.. దానికి కూడా సల్మాన్ తప్పు అని బదులిచ్చారు. న్యాయస్థానం సల్మాన్ వాంగూల్మంతోపాటు సైఫ్ అలీ ఖాన్ స్టేట్‌మెంట్‌ను కూడా రికార్డు చేసింది.

హిందీ మూవీ హమ్ సాథ్ సాథ్ హైన్ సినిమా షూటింగ్‌లో పాల్గొన్న సల్మాన్అక్టోబర్ 1, 1998 రాత్రి సమయంలో కృష్ణ జింకలను వేటాడారనే అభియోగాలు వచ్చాయి. ఈ కేసులో టబు, సోనాలి బింద్రే లాంటి ఇతర బాలీవుడ్ నటులపై కూడా ఆరోపణలు వచ్చాయి. అక్రమ ఆయుధాల కేసు నుంచి సల్మాన్‌కు ఇటీవలే విముక్తి లభించిన సంగతి తెలిసిందే.