భారతీయ కార్లపై హీరో కామెంట్.. తిట్టిపోసిన నెటిజన్స్

సెలబ్రిటీలు సోషల్ మీడియాలో ఆచి తూచి వ్యవహరించాలి. ఎందుకంటే వారు ఏం చేసినా ట్రోల్ చేయడానికి నెటిజన్లు సిద్ధంగా ఉంటారు. తాజాగా బాలీవుడ్ నటుడు అర్జున్ రాంపాల్‌కు ఇలాంటి ఘటనే ఎదురైంది. ఈ రోజు ఉదయం ఆయన ముంబయి వీధుల్లో కారులో ప్రయాణించారు. ఆ సమయంలో ముంబయిని భారీ వర్షాలు వరదలు ఎలా ముంచెత్తాయో వివరిస్తూ వీడియో తీశారు. ఆ వీడియోను సోషల్ మీడియాలో పోస్ట్ చేశారు.

‘ఈ వాతావరణాన్ని కేవలం భారతీయ కార్లే తట్టుకోగలుగుతాయి. క్షేమంగా ఉండండి. భారతీయ వాహనాలను వాడండి’ అని క్యాప్షన్ ఇచ్చారు. అర్జున్ వీడియో తీసింది వరదల్లో చిక్కుకున్న మెర్సిడీస్ కారుని. అంటే విదేశీ కంపెనీలకు చెందిన కార్లు భారతీయ వాతావరణాన్ని తట్టుకోలేవని ఆయన అభిప్రాయం. దాంతో నెటిజన్లు ఆయనకు హితబోధ చేయడం మొదలుపెట్టారు. ‘చెత్త వాగుడు ఆపు బ్రో. నువ్వు కూడా రేంజ్ రోవర్ కారును అమ్మేసి మారుతి ఆల్టో కొనుక్కోవచ్చు కదా..’ అని ప్రశ్నించారు. ఇందుకు అర్జున్ స్పందిస్తూ.. ‘నేను వీడియో తీసింది ఆల్టో కారులో కూర్చునే..’ అని తనదైన శైలిలో సమాధానమిచ్చారు. ఈ ఒక్క రిప్లైకి కొద్ది సేపట్లోనే నాలుగు వేల లైక్‌లు వచ్చాయి.

మరోపక్క ముంబయి భారీ వర్షాలతో అతలాకుతలం అవుతోంది. బాలీవుడ్ మెగాస్టార్ అమితాబ్ బచ్చన్ పాత నివాసమైన ‘ప్రతీక్ష’లోకి నీరు వచ్చి చేరింది. యువ హీరో విక్కీ కౌశల్ కారు నీటిలో చిక్కుకుపోయింది. నటి భూమి పెడ్నేకర్ ట్రాఫి‌క్‌లో చిక్కుకుపోయానంటూ వీడియో పోస్ట్ చేశారు. సెలబ్రిటీల పరిస్థితే ఇలా ఉంటే ఇక సామాన్య ప్రజల పరిస్థితేంటో ఊహించవచ్చు. గత 36 గంటల్లో ముంబయి, థానే, పాల్ఘడ్, రాయ్‌గడ్ ప్రాంతాల్లో 25 నుంచి 30 సెంటీమీటర్ల మేర భారీగా వర్షం పడిందని వాతావరణ కేంద్రం వెల్లడించింది. ముంబయిలో ఎప్పుడు వర్షాలు పడినా పరిస్థితి చాలా దారుణంగా ఉంటుంది. ఎప్పటికప్పుడు సెలబ్రిటీలు జాగ్రత్తగా ఉండాలని సోషల్ మీడియా ద్వారా అభిమానులను హెచ్చరిస్తూ ఉంటారు.