'పద్మావతి' ఒంటరి కాదు.. మేమున్నాం..!

పద్మావతి సినిమాలో పద్మావతి పాత్రను కించపర్చేలా చిత్రీకరించారని ఆరోపిస్తూ కొన్నివర్గాలు ఆ చిత్రం విడుదలను అడ్డుకోవాలని ప్రయత్నిస్తున్న తరుణంలో బాలీవుడ్ పరిశ్రమ పద్మావతి మేకర్స్‌కి అండగా నిలిచింది. బాలీవుడ్ సినీ పరిశ్రమకి చెందిన పలువురు ప్రముఖులు ఆదివారం ముంబైలో సమావేశమై సంజయ్ లీలా భన్సాలీకి తమ మద్దతు తెలియజేశారు.

కర్ణిసేన, రాజ్‌పుత్ గ్రూపులు దేశవ్యాప్తంగా పర్యటించి మరీ పద్మావతి సినిమాను అడ్డుకుంటామని బెదిరించడం చూస్తోంటే అసలు మన ప్రజాస్వామ్యంలో భావప్రకటన స్వేచ్ఛ వున్నట్టా ? లేనట్టా అనే అనుమానం కలుగుతోందని బాలీవుడ్ ప్రముఖులు సందేహం వ్యక్తంచేశారు.

26/11 ఉగ్రదాడుల బాధితులని స్మరించుకునేందుకు ఒక్కచోట చేరిన సందర్భంగా పద్మావతి యూనిట్ సభ్యులపై జరుగుతున్న దాడులు, వారికి ఎదురవుతున్న బెదిరింపులపై స్పందించే క్రమంలో బాలీవుడ్ ప్రముఖులు 'పద్మావతి'కి అండగా నిలవనున్నట్టు ప్రకటించారు.

'పద్మావతి' వివాదంపై స్పందించిన ఇండియన్ ఫిలింస్ అండ్ టీవీ డైరెక్టర్స్ అసోసియేషన్(ఐఎఫ్‌టీడీఏ) అధ్యక్షుడు అశోక్ పండిట్.. సినిమాలని తెరకెక్కించడంలో తాము బాధ్యతయుతంగానే వ్యవహరిస్తున్నామని, తమ బాధ్యతల గురించి ఇంకెవరో వచ్చి గుర్తుచేయాల్సిన అవసరం లేదని అన్నారు. ఈ విషయంలో కేంద్రం జోక్యం చేసుకుని సమస్యను పరిష్కరించాలని అభిప్రాయపడ్డారు అశోక్ పండిట్.