గ్రామీణులను పెళ్లాడిన బాలీవుడ్ భామలు!

కుర్రకారుకు గుండె బద్దలయ్యే వార్త.. బాలీవుడ్ భామలు దీపికా పదుకొణె, జాక్వెలిన్ ఫెర్నాండెజ్, సోనాక్షి సిన్హాలకు పెళ్లైపోయింది. ఉత్తర ప్రదేశ్‌లోని ఫరూఖాబాద్ జిల్లాలోని గ్రామీణ ప్రాంతాలకు చెందిన రాకేశ్ చంద్ర, సాధు లాల్, రమేశ్ చంద్రలను వీరు పెళ్లాడారు. ఏంటి ఇదంతా నిజమేనా అని మీకు సందేహం కలుగుతోందా..? అయితే అసలు విషయంలోకి రండి. ఫరూఖాబాద్ ఆహార, ప్రజా సరఫరాల శాఖ వెబ్‌సైట్‌లో ఈ ముగ్గురు ముద్దుగుమ్మలకు పెళ్లైనట్లు పొందుపరిచారు. అంతేకాకుండా వీరి భర్తల పేర్లు తెలుపుతూ రేషన్ కార్డులు జారీ చేశారు. వీరితో పాటు దర్శక నిర్మాత ఆదిత్య చోప్రా భార్య, నటి రాణీ ముఖర్జీకి కూడా మళ్లీ పెళ్లి చేసేశారు. ఫరూఖాబాద్ జిల్లాలోని సాహెబ్‌గంజ్ గ్రామానికి చెందిన వ్యక్తి భార్య రాణీగా తెలుపుతూ రేషన్ కార్డును జారీ చేశారు. ఈ విషయాన్ని కొంతమంది సామాజిక కార్యకర్తలు ఉన్నతాధికారుల దృష్టికి తీసుకెళ్లడంతో విషయం బయటకొచ్చింది. కొందరు మోసగాళ్లు కావాలనే ఈ నకిలీ రేషన్ కార్డుల కోసం దరఖాస్తు చేసుకున్నారు. వీరందరికీ ‘అంత్యోదయ’ పథకం కింద కార్డులు జారీ చేశారు.
ఆసక్తికర విషయమేమిటంటే, ఈ నకిలీ రేషన్ కార్డుల కోసం రాణీకి జనరల్ కేటగిరీలో.. జాక్వెలిన్, రాణీ, సోనాక్షిలకు వెనుకబడిన తరగతుల విభాగంలో దరఖాస్తు చేసుకున్నారు. ఈ హీరోయిన్ల వార్షిక ఆదాయం రూ. 18000గా మోసగాళ్లు దరఖాస్తులో పొందుపరిచారు. మోసాన్ని గ్రహించిన అధికారులు నాలుక కరుచుకుని తప్పును సరిదిద్దారు.