Anikha Surendran ని చీర కట్టుకుని రమ్మంటావా? రిపోర్టర్‌కి ‘బుట్టబొమ్మ’ ప్రొడ్యూసర్ కౌంటర్

చైల్డ్ ఆర్టిస్ట్‌గా అందరికీ సుపరిచితమైన అనికా సురేంద్రన్‌ (Anikha Surendran) హీరోయిన్‌గా ‘బుట్టబొమ్మ’ (Butta Bomma) సినిమాతో ప్రేక్షకుల ముందుకు రాబోతోంది. ఈ మూవీలో అర్జున్‌ దాస్‌, సూర్య వశిష్ట మెయిన్ రోల్స్‌లో నటిస్తుండగా.. శౌరి చంద్రశేఖర్ రమేష్ ఈ సినిమాతో దర్శకుడిగా పరిచయం అవుతున్నాడు. ఫార్చ్యూన్ ఫోర్ సినిమాస్ పార్ట్‌నర్ షిప్‌తో సితార ఎంటర్‌టైన్స్‌మెంట్స్ ఈ మూవీని నిర్మించింది. ఫిబ్రవరి 4న బుట్టబొమ్మ సినిమా వరల్డ్‌వైడ్ రిలీజ్ కాబోతోంది. దాంతో శనివారం ఈ చిత్ర బృందం ట్రైలర్ లాంచ్ ఈవెంట్‌ని నిర్వహించింది. ఈ క్రమంలో ఓ రిపోర్టర్ అడిగిన ప్రశ్నకి ప్రొడ్యూసర్ నాగవంశీ (Producer Naga Vamsi) చిరుకోపం ప్రదర్శించాడు. వాస్తవానికి బుట్టబొమ్మ మూవీ జనవరి 26న రిలీజ్ కావాల్సి ఉంది. కానీ.. స్పష్టమైన కారణాలు చెప్పకుండానే మూవీ రిలీజ్‌ని ఫిబ్రవరి 4కి వాయిదా వేశారు. ఇప్పటికే బుట్ట బొమ్మ మూవీ నుంచి రిలీజైన పాట, పోస్టర్‌ సినిమాపై ఆసక్తిని పెంచుతోంది.

వేదికపై అనికా సురేంద్రన్‌ మోడ్రన్ డ్రెస్‌లో ఉండటంతో.. ఓ రిపోర్టర్.. హీరోయిన్ డ్రెస్సింగ్ స్టయిల్‌కి సినిమాలో మీరు చూపించబోతున్న క్యారెక్టర్‌కి చాలా వ్యత్యాసం ఉన్నట్లుంది? అని అడిగారు. దానికి నాగవంశీ వెంటనే స్పందిస్తూ.. ‘ఈ అమ్మాయి బుట్టబొమ్మలా లేదా? అంటే ఏంటి మీరు చెప్పేది.. ఈ హీరోయిన్‌ని చీర కట్టుకుని రమ్మంటావా?’ అంటూ కౌంటర్ వేశారు.

మూవీ మొత్తం అనికా సురేంద్రన్‌ చుట్టూ తిరుగుతందని స్పష్టం చేసిన నాగవంశీ.. బుట్టబొమ్మ టైటిల్ పెట్టడానికి గల కారణాన్ని కూడా వెల్లడించారు. మూడేళ్ల క్రితం ఇదే బ్యానర్‌పై వచ్చిన ‘అల.. వైకుంఠపురములో’ మూవీ హిట్ అవగా.. అందులోని బుట్టబొమ్మ పాట కూడా అందరికీ నచ్చింది. దాంతో బుట్టబొమ్మ టైటిల్ బాగుంటుందని పెట్టినట్లు గుర్తు చేసుకున్నారు. మలయాళం మూవీ ‘కప్పేల’సినిమాకి రీమేక్‌గా బుట్టబొమ్మని తెరకెక్కించారు. ఈ ట్రైలర్ లాంచ్ ఈవెంట్‌కి విశ్వక్‌సేన్‌ చీఫ్ గెస్ట్‌గా వచ్చాడు.


Read Latest Telugu Movies News , Telugu News