VV Lakshmi Narayana: సినిమాల్లోకి సీబీఐ మాజీ జేడీ లక్ష్మీనారాయణ ఎంట్రీ.. రియల్ లైఫ్ క్యారెక్టర్‌లోనే..!

సీబీఐ మాజీ జాయింట్ డైరెక్టర్ వీవీ లక్ష్మీనారాయణ (VV Lakshmi Narayana) సినిమాల్లోకి ఎంట్రీ ఇచ్చారు. రియల్ లైఫ్ క్యారెక్టర్‌లోనే ఆయన నటించినట్లు తెలుస్తోంది. లక్ష్మీనారాయణతో పాటు ప్రముఖ రాజకీయ విశ్లేషకుల ప్రొఫెసర్ నాగేశ్వరరావు, కాంగ్రెస్ నేత అద్దంకి దయాకర్ కూడా స్క్రీన్‌పై కనిపించనున్నారు. రమేశ్ చెప్పాల డైరెక్షన్‌లో భీమదేవరపల్లి బ్రాంచి (Bheemadevarapally Branch) అనే మూవీతో తెరకెక్కుతోంది. ఈ సినిమాలో లక్ష్మీనారాయణ, ప్రొఫెసర్ నాగేశ్వరరావు, అద్దంకి దయాకర్ యాక్ట్ చేస్తున్నారు.

ఈ సందర్భంగా డైరెక్టర్ రమేశ్ చెప్పాల మాట్లాడుతూ.. గతంలో సీబీఐ జేడీగా పనిచేసిన వీవీ లక్ష్మీనారాయణ తమ సినిమాలో నటించారని తెలిపారు. ఆయనతో పాటు ప్రొఫెసర్ నాగేశ్వరరావు, అద్దంకి దయాకర్ కూడా తమ సినిమాలో యాక్ట్ చేయడం ఎంతో సంతోషంగా ఉందన్నారు. గతంలో డైరెక్టర్ రామ్ గోపాల్ వర్మ అడిగినా నటించడానికి అంగీకరించని నాగేశ్వరరావు.. తన చిత్రంలో నటించడం ఆనందంగా ఉందని చెప్పారు. కథలో సహజత్వం పోకూడదనే ఉద్దేశంతో వెతికి వెతికి అనేక మంది థియేటర్ ఆర్టిస్టులను యాక్ట్ చేసేలా ఒప్పించామన్నారు. వాస్తవికత కళ్ల ముందుంచే ఈ సినిమా ప్రతి ఒక్కరిని కదిలిస్తుందన్నారు దర్శకుడు.

బత్తిని కీర్తి లతా గౌడ్ నిర్మించిన ఈ మూవీ ప్రస్తుతం పోస్ట్ ప్రొడక్షన్ పనులు జరుపుకుంటోంది. ఇటీవల జరిగిన ఓ యథార్థ సంఘటన ఆధారంగా ఈ సినిమాను రూపొందించారు. త్వరలోనే ఆడియన్స్ ముందుకు తీసుకువచ్చేందుకు మూవీ మేకర్స్ ప్లాన్ చేస్తున్నారు.