మరో సీనియర్ హీరోయిన్ పెళ్లి చేసుకుంటోందా?

లేదు లేదంటూనే.. ఈ మధ్య కాలంలో హీరోయిన్లు వరస పెట్టి పెళ్లిళ్లు చేసుకొంటూ ఉన్నారు. బాలీవుడ్, టాలీవుడ్ హీరోయిన్ల పెళ్లి వార్తలు వరసగా వస్తూనే ఉన్నాయి. సమంత, అనుష్కా శర్మ, శ్రియ, సోనమ్ కపూర్, నేహా ధూపియా.. ఇలా వీళ్లంతా ఇటీవలి కాలంలో పెళ్లిళ్లు చేసుకున్నారు. ఈ జాబితాలో ఇప్పుడు మరికొంతమంది హీరోయిన్లు కూడా చేరే అవకాశాలు కనిపిస్తున్నాయి. ఇందులో ఒక దక్షిణాది ప్రముఖ హీరోయిన్ పేరు కూడా చేరనుందనే మాట వినిపిస్తోందిప్పుడు.

ఆమె మరెవరో కాదు త్రిష. ఈమె త్వరలోనే పెళ్లి చేసుకోబోతోందని సమాచారం. ఇండస్ట్రీకి వచ్చి ఇప్పటికే దశాబ్ధంన్నర కాలం పూర్తి అయినా ఇప్పటికీ అవకాశాలు పొందుతోంది త్రిష. సీనియర్ హీరోల సరసన ఈమెకు అవకాశాలు వస్తున్నాయి. ఇప్పుడు త్రిష వయసు కూడా 35 సంవత్సరాలు. ఈ నేపథ్యంలో ఇప్పుడు ఈమె పెళ్లి ప్రయత్నాల్లో ఉందని టాక్.

ఆ మధ్య ఒక వ్యాపారవేత్తతో త్రిష ఎంగేజ్ మెంట్ కూడా జరిగింది. అయితే పెళ్లి వరకూ వెళ్లలేదు ఆ నిశ్చితార్థం. ఇప్పుడు మరో వ్యాపారవేత్తతో త్రిష ప్రేమలో ఉందని.. త్వరలోనే అతడిని పెళ్లి చేసుకోబోతోందని కూడా వార్తలు వస్తున్నాయి. అయితే ఈ విషయాన్ని త్రిష కానీ ఆమె తల్లి కానీ ధ్రువీకరించలేదు ఇంకా. కానీ ఉన్నట్టుండి త్రిష పెళ్లి అయిపోయిన విషయాన్ని ప్రకటించవచ్చు అని సినీ వర్గాల్లో చర్చ జరుగుతోంది.