నన్ను తాకరానిచోట తాకాడు: సింగర్‌ చిన్మయి

ప్రముఖ సింగర్, డబ్బింగ్ ఆర్టిస్ట్ చిన్మయి శ్రీపాద లైంగిక వేధింపులకు గురైన చేదు అనుభవాన్ని సోషల్ మీడియా ద్వారా పంచుకున్నారు. ఆదివారం నాడు ఓ ప్రైవేటు ఈవెంట్‌కు హాజరైన తనవైపు కొంత మంది ఆకతాయిలు గుంపుగా వచ్చారని అందులో ఒకవ్యక్తి తనను చేతులతో తడిమేందుకు ప్రయత్నించాడని.. తాకరాని చోట తాకాడంటూ తనపై జరిగిన వేధింపులను బయటపెట్టారు. అయితే ఈ వేధింపుల విషయాన్ని సన్నిహితులతో షేర్ చేసుకున్నప్పుడు వాళ్లు కూడా తాము చిన్న పిల్లలుగా ఉన్నప్పుడు వేధింపులకు గురైన విషయాన్ని తెలుసుకుని షాకయ్యా అన్నారు.

అయితే ఇలాంటి విషయాల్లో మౌనంగా ఉండకూడదని.. వెంటనే వారి చెంప చెల్లుమనిపించాలంటూ ట్విట్టర్ వేదికగా వరుస ట్వీట్‌లను చేశారు చిన్మయి. తమపై వేధింపుల జరిగాయని ఎవరైనా ముందుకొస్తే ప్రస్తుత పరిస్థితిల్లో నమ్మేవారు తక్కువైపోవడంతో ఎవరూ ముందుకు రావడం లేదన్నారు. వేధింపులు ఎక్కడబడితే అక్కడే ఉన్నాయన్నారు. వాళ్ల సొంత ఇళ్లు, చదువుకునే ప్రదేశాలు, ఉద్యోగం చేసే ప్రదేశాల్లో ఇలా ఎక్కడ చూసినా వేధింపులు చోటు చేసుకుంటున్నాయన్నారు. ఇలాంటి సంఘటనల గురించి చాలా మంది అమ్మాయిలు, అబ్బాయిలు వారి కుటుంబ సభ్యులు, స్నేహితులతో కూడా పంచుకోవడానికి ధైర్యం చేయడం లేదు. ఒకవేళ ధైర్యం చేసి చెప్పినా వారికి అండగా నిలవాల్సింది పోయి.. ఆమె ఎలాంటి వస్త్రాలు వేసుకుంది, లిప్‌స్టిక్, జుట్టు, స్కిన్ కలర్, దుస్తులు, ప్రవర్తన లాంటి విషయాల్లో బ్లేమ్ చేయడం పనిగా పెట్టుకున్నారని, సాటి మహిళ వేధింపులకు గురైతే మహిళలే ఇలాంటి కామెంట్ చేస్తున్నారని దయచేసి వాళ్లని బ్లేమ్ చేయడం ఆపాలని కోరారు.

లైంగిక వేధింపుల గురించి తల్లిదండ్రులకు చెప్తే.. చదువు, ఉద్యోగాన్ని మాన్పించి ఇంట్లో కూర్చోబెడతారేమోనన్న భయంతో అమ్మాయిలు వెనుకాడుతున్నారని ఇలాంటి సందర్భంలో వాళ్లకు అండగా నిలబడాలన్నారు. మీ అనుమతి లేకుండా మిమ్మిల్ని ఎవరైనా తాకాలని ప్రయత్నిస్తే.. వెంటనే వాళ్ల చెంప పగలగొట్టండి.. మౌనంగా ఉండకండంటూ పిలుపునిచ్చారు చిన్మయి.