చిన్నల్లుడితో చిరు సంక్రాంతి సంబరం

సంక్రాంతి అంటేనే అల్లుళ్ల పండగ. ఈ పండగకు అల్లుళ్లు అత్తగారింటికి రావడం ఆనవాయితీ. అత్తారింటిలో వండిన పిండి వంటలు బాగా ఆరగించి.. అత్తింటివారిచ్చని పండు కానుకలతో ఎంతో సంతోషంగా తిరిగి వెళ్తారు. మన తెలుగుంటి ఈ సంప్రదాయానికి పేద, ధనిక అనే బేధం లేదు. ఎవరి స్తోమతను బట్టి వారు అల్లుళ్లకు సకల మర్యాదలు చేస్తుంటారు. ఈ ఏడాది మెగాస్టార్ చిరంజీవి కూడా తన చిన్నల్లుడికి పండుగ ఆతిథ్యమిచ్చారు. ఈ సంక్రాంతిని చిన్నల్లుడితో కలసి ఆనందంగా జరుపుకున్నారు. ఈ మేరకు అల్లుడితో దిగిన ఓ ఫొటోను మీడియాకు విడుదల చేశారు.

‘సైరా నరసింహారెడ్డి’ సినిమా కోసం మీసం తీసిన చిరు.. అదే లుక్‌లో సంప్రదాయబద్ధంగా పట్టుపంచె కట్టుకున్నారు. నల్ల కళ్లాద్దాలతో అదరగొట్టారు. ఆయన పక్కన చిన్నల్లుడు కళ్యాణ్ బ్లూషర్ట్, జీన్స్ వేసుకుని చిరునవ్వుతో నిలుచున్నారు. ప్రస్తుతం ఈ ఫొటో సోషల్ మీడియాలో వైరల్ అవుతోంది. ఇదిలా ఉంటే కళ్యాణ్ త్వరలో వెండితెరకు పరిచయం కాబోతున్నారు. ఆయన హీరోగా ఓ సినిమాను నిర్మిస్తున్నారు. వారాహి చలన చిత్రం పతాకంపై సాయి కొర్రపాటి నిర్మిస్తున్న ఈ సినిమాకు రాకేశ్ శశి దర్శకత్వం వహిస్తున్నారు. కళ్యాణ్‌ పక్కన అనుపమా పరమేశ్వరన్ హీరోయిన్‌గా నటించనున్నట్లు సమాచారం.

ఇదిలా ఉంటే.. ఫస్ట్ షెడ్యూల్ షూటింగ్‌ను పూర్తిచేసుకున్న చిరంజీవి ‘సైరా’ ఇప్పుడు రెండో షెడ్యూల్‌కు రెడీ అవుతుంది. మొదట రెండో షెడ్యూల్‌ను రాజస్థాన్ లేదా పొలాచ్చిలో జరపాలని అనుకున్నారు. కానీ తాజా సమాచారం ప్రకారం సైరా నరసింహారెడ్డి రెండో షెడ్యూల్‌ను కేరళలో ప్లాన్ చేశారు. ఫిబ్రవరి మొదటి వారం నుంచి రెండో షెడ్యూల్ మొదలయ్యే అవకాశం ఉంది. ఈ షెడ్యూల్ లో నయనతార కూడా పాల్గొననున్నట్లు సమాచారం. ఈ షెడ్యూల్ కోసమే మెగాస్టార్ మీసం తీసేశారట.