భీమ్లా నాయక్‌పై చిరంజీవి సింగిల్ లైన్ కామెంట్.. మెగా సంబరాలకు రెక్కలు!!

మెగా సంబరాలు మిన్నంటేలా 'భీమ్లా నాయక్' సినిమాపై కామెంట్ చేశారు మెగాస్టార్ చిరంజీవి. తమ్ముడు పవన్, హీరో రానాలతో దిగిన పోస్ట్ షేర్ చేస్తూ చిరు పెట్టిన పోస్ట్ నెట్టింట వైరల్‌గా మారింది. భీమ్లా నాయక్ మేనియా కొనసాగుతున్న ఈ సమయంలో మెగాస్టార్ పోస్ట్ మరింత హుషారెత్తించింది. ఇంతకీ చిరంజీవి ఏమన్నారు? ఆయన ట్వీట్ ఎలా ఉందో చూద్దామా..

కరోనా కారణంగా గత కొన్ని నెలలుగా వెలవెలబోయిన సినిమా థియేటర్స్ 'భీమ్లా నాయక్' రాకతో కిక్కిరిసిపోయాయి. భారీ అంచనాల నడుమ నేడు (ఫిబ్రవరి 25) ఈ సినిమా రిలీజ్ కావడంతో జనమంతా థియేటర్ల బాట పట్టారు. దీంతో అన్ని ఏరియాల్లోనూ హౌస్‌ఫుల్ కలెక్షన్స్‌తో సత్తా చాటాడు భీమ్లా నాయక్. పోలీస్ ఆఫీసర్ పాత్రలో పవన్ కళ్యాణ్, డానియల్ శేఖర్ పాత్రలో దగ్గుబాటి రానా పోటీపడి నటించారని, అన్ని వర్గాల ప్రేక్షకులకు ఇదో విజువల్ ట్రీట్ అని ఆడియన్స్ నుంచి బయటకొచ్చిన మాట.

ఈ పరిస్థితుల నడుమ భీమ్లా నాయక్ తిరుగులేని రెస్పాన్స్ తెచ్చుకున్నందుకు హృదయ పూర్వకంగా అభినందనలు తెలుపుతున్నా అంటూ చిరంజీవి ట్వీట్ చేశారు. 'ఇది నిజమైన పవర్ తుఫాన్' అంటూ సింగిల్ లైన్ రివ్యూ ఇచ్చేశారు. ఇంకేముంది ఈ సందేశం చూసిన మెగా ఫ్యాన్స్ లైకుల వర్షం కురిపిస్తూ తెగ మురిసిపోతున్నారు. ప్రస్తుతం ఈ ట్వీట్ నెట్టింట తెగ చెక్కర్లు కొడుతోంది.
బ్యాక్‌బోన్ ఆఫ్ భీమ్లా నాయక్ అదే! హరీష్ శంకర్ కామెంట్స్ వైరల్
సితార ఎంటర్‌టైన్‌మెంట్స్‌ బ్యానర్‌పై 'అయ్యప్పనుమ్ కోషియుమ్‌' తెలుగు రీమేక్‌గా భారీ రేంజ్‌లో ఈ 'భీమ్లా నాయక్' మూవీ రూపొందింది. సాగర్ కే చంద్ర దర్శకత్వం వహించిన ఈ సినిమాకు త్రివిక్రమ్ శ్రీనివాస్ మాటలు, దర్శకత్వ పర్యవేక్షణ చేశాడు. తమన్ బాణీలు కట్టారు. నిత్య మీనన్, సంయుక్త మీనన్ హీరోయిన్లుగా నటించారు. తొలి షోతోనే సక్సెస్ టాక్ తెచ్చుకోవడంతో ఈ సినిమా ప్రభంజనం ఎలా ఉంటుందనేది ఆసక్తికరంగా మారింది.