హార్స్ రైడింగ్‌లో ఉయ్యాలవాడ నర్సింహా రెడ్డి

'ఖైదీ నెంబర్ 150'తో మళ్లీ మేకప్ వేసుకున్న మెగాస్టార్ చిరంజీవి అప్పటి నుంచి ఎప్పుడూ ఏదో ఓ పనితో బిజీగానే వుంటూ వస్తున్నారు. ఖైదీ నెంబర్ 150 సక్సెస్ ఆస్వాదిస్తూనే మీలో ఎవరు కోటీశ్వరుడు షో ఎపిసోడ్స్ షూటింగ్ మేనేజ్ చేసుకుంటున్న చిరు మరోవైపు తన తర్వాతి చిత్రానికి కూడా సన్నద్ధమవుతున్నారు. స్వాతంత్య్ర సమరయోధుడు 'ఉయ్యాలవాడ నరసింహా రెడ్డి' యధార్థగాధ ఆధారంగా తెరకెక్కనున్న చిత్రం కావడంతో ఆ పాత్ర కోసం తనని తాను అన్ని విధాల సిద్ధం చేసుకుంటున్నారు చిరు. అందులో భాగంగానే ప్రస్తుతం గుర్రపు స్వారీని ప్రాక్టీసు చేస్తున్నారు. గుర్రపు స్వారీతోపాటు కత్తి యుద్ధం సన్నివేశాల కోసం కూడా చిరు ప్రిపేర్ అవుతున్నారు.

గతంలో అనేక చిత్రాల్లో గుర్రపు స్వారీ చేసిన చిరుకి ఉయ్యాలవాడ నరసింహా రెడ్డి పాత్ర కోసం హార్స్ రైడింగ్ చేయడం ఇదేం కొత్త కాదు. కాకపోతే మధ్యలో చాలా గ్యాప్ వచ్చి, ప్రాక్టీసు తప్పింది కనుక ప్రస్తుతం మరోసారి తన హార్స్ రైడింగ్ నైపుణ్యానికి మెరుగు పెడుతున్న మెగాస్టార్... అందుకోసం హైదరాబాద్ రేస్ కోర్స్‌లో సాధన చేస్తున్నట్టు తెలుస్తోంది.

స్టైలిష్ డైరెక్టర్‌గా పేరున్న సురేందర్ రెడ్డి డైరెక్ట్ చేయనున్న ఈ సినిమాకి పరుచూరి బ్రదర్స్ కథని అందిస్తున్నారు. 'ఖైదీ నెంబర్ 150' తర్వాత కొనిదెల బ్యానర్‌పై రామ్‌చరణ్ నిర్మించనున్న మరో సినిమా ఇదే అవుతుంది.