Chiranjeevi - రాజ్ బాణీలు నన్ను ప్రేక్షకులకు మరింత చేరువ చేశాయి: చిరంజీవి

పాపులర్ మ్యూజిక్ డైరెక్టర్ రాజ్ (Music Director Raj) ఈరోజు హఠాన్మరణం చెందారు. రాజ్-కోటిగా పాపులర్ అయిన సంగీత ద్వయంలో రాజ్.. గుండెపోటుతో ఈరోజు కన్నుమూశారు. ఆయన మృతికి మెగాస్టార్ చిరంజీవి (Chiranjeevi) సంతాపం తెలియజేశారు. ఆయన కుటుంబసభ్యులకు తన ప్రగాఢ సానుభూతిని ప్రకటించారు. ఈ మేరకు ట్విట్టర్ ద్వారా చిరంజీవి స్పందించారు. ‘ప్రముఖ సంగీత దర్శక ద్వయం రాజ్-కోటిలలో ‘రాజ్’ ఇక లేరు అని తెలవటం దిగ్భ్రాంతికి గురి చేసింది. ఎంతో ప్రతిభ ఉన్న రాజ్, నా కెరీర్ తొలి దశలలో నా చిత్రాలకందించిన ఎన్నో అద్భుత ప్రజాదరణ పొందిన బాణీలు, నా చిత్రాల విజయాలలో ముఖ్య పాత్ర వహించాయి. నన్ను ప్రేక్షకులకు మరింత చేరువ చేశాయి. రాజ్ అకాల ప్రస్థానం సంగీత ప్రపంచానికి తీరని లోటు. ఆయన అభిమానులకి, కుటుంబ సభ్యులందరికీ నా ప్రగాఢ సంతాపం. ఓం శాంతి!’ అని చిరంజీవి ట్వీట్ చేశారు.
చాలా ఏళ్లుగా సినిమాలకు దూరంగా ఉంటున్న రాజ్.. తన 68వ ఏట ఈరోజు హఠాన్మరణం చెందారు. ఆయన మృతి తెలుగు సినీ పరిశ్రమను షాక్‌కు గురిచేసింది. సాలూరి కోటేశ్వరరావు అలియాస్ కోటితో కలిసి పనిచేసిన రాజ్ అసలు పేరు తోటకూర సోమరాజు. కెరీర్ ప్రారంభంలో చక్రవర్తి దగ్గర అసిస్టెంట్లుగా పనిచేసిన సమయంలో రాజ్‌తో కోటికి పరిచయం ఏర్పడింది. ఆ తరవాత వారిద్దరూ కలిసి పనిచేయాలని నిర్ణయించుకున్నారు. 1980ల్లో కలిసి ప్రయాణం మొదలుపెట్టిన రాజ్-కోటి.. 90ల్లో స్టార్ కంపోజర్లుగా ఎదిగారు. ఎన్నో వేల హిట్ సాంగ్స్‌ను తెలుగు ప్రేక్షకులకు అందించారు.

దశాబ్ద కాలం పాటు సక్సెస్‌ఫుల్ మ్యూజిక్ కంపోజర్లుగా కెరీర్‌ను ముందుకు తీసుకెళ్లిన ఈ ద్వయం.. వ్యక్తిగత కారణాలతో విడిపోయారు. కోటి నుంచి విడిపోయిన తరవాత ‘సిసింద్రీ’, ‘రాముడొచ్చాడు’, ‘చిన్ని చిన్ని ఆశ’తో పాటు పలు సినిమాలకు సోలోగా సంగీతం సమకూర్చారు. వెంకటేష్ హీరోగా వచ్చిన ‘ప్రేమంటే ఇదేరా’ సినిమాను నేపథ్య సంగీతం అందించారు. 2002 తరవాత ఏ సినిమాకు సంగీతం సమకూర్చని రాజ్.. ఇటీవల ‘ఓ బేబీ’ సాంగ్ లాంచ్ ఈవెంట్‌లో కనిపించారు. ఇప్పుడు ఆయన హఠాన్మరణం అందరినీ దిగ్భ్రాంతికి గురిచేసింది. రాజ్‌కు భార్య, ముగ్గురు కుమార్తెలు ఉన్నారు.