త్రివిక్రమ్‌కు ఇది పెద్ద ఛాలెంజ్

మెగా బ్రదర్స్ చిరంజీవి, పవన్ కల్యాణ్‌లను ఒకే ఫ్రేమ్‌లో పెట్టి సినిమా చేయాలని చాలా మంది దర్శకులు ప్రయత్నించారు. కానీ వారికి నిరాశే ఎదురయింది. ఇప్పుడు అటువంటి అరుదైన అవకాశం త్రివిక్రమ్‌కు దక్కింది. అయితే ఇప్పుడు అదే తన లైఫ్ కి పెద్ద చాలెంజింగ్‌గా మారింది. మొదట చిరు, పవన్ కాంబినేషన్ అంటే అసాధ్యమని అందరూ లైట్ తీసుకున్నారు. కానీ సుబ్బిరామిరెడ్డి నిర్మాత కాబట్టి ఈ సినిమా పట్టాలెక్కే అవకాశాలు ఉన్నాయని మెగాభిమానులు భావిస్తున్నారు.

ఈ ఇద్దరు హీరోలను తెరపై చూపించగలిగే సత్తా త్రివిక్రమ్‌కు మాత్రమే ఉందని సుబ్బిరామిరెడ్డి గట్టి నమ్మకం. ఏదో ఇద్దరినీ ఒక తెరపై చూపించేస్తే సరిపోదు.. దానికి తగ్గ కథ కూడా కావాలి. త్రివిక్రమ్ లాంటి డైరెక్టర్ దగ్గర కథలకు కొరతేమీ ఉండదు. సాధారణ పాయింట్‌ను కూడా ఎవరి ఊహలకు అందకుండా తెరపై ప్రెజంట్ చేయడం త్రివిక్రమ్ స్పెషాలిటీ. ఇప్పటికే త్రివిక్రమ్ ఓ లైన్ కూడా రెడీ చేశాడట.

ఈ సినిమాలో చిరు, పవన్ లు అన్నదమ్ముల్లానే కనిపించే అవకాశాలు ఉన్నాయని అంటున్నారు. హీరోలు, నిర్మాత, టెక్నికల్ టీం ఇలా ఎంత మంది ఉన్నా ఇలాంటి ఓ భారీ సినిమా అది కూడా అభిమానుల అంచనాలు ఏ మాత్రం తగ్గకుండా తీయడమంటే మామూలు విషయం కాదు. ఇక బాధ్యత మొత్తం త్రివిక్రమ్ పైనే ఉంది. మరి ఎంత గొప్పగా త్రివిక్రమ్ కథను మలుస్తాడో చూడాలి.