చిరు, పవన్ కాంబో సినిమాపై రెడ్డిగారి అప్ డేట్!

మెగాస్టార్ చిరంజీవి, పవర్ స్టార్ పవన్ కల్యాణ్ కాంబినేషన్ లో సినిమాను తీస్తానని ఆ మధ్య ప్రకటించారు కాంగ్రెస్ పొలిటీషియన్ కమ్ సినీ నిర్మాత టి.సుబ్బరామిరెడ్డి. నిర్మాతగా చాలా సినిమాలనే రూపొందించిన సుబ్బరామిరెడ్డి చిరు, పవన్ ల కాంబినేషన్ లో సినిమాను తీస్తానని, దానికి త్రివిక్రమ్ శ్రీనివాస్ దర్శకత్వం వహిస్తారని అన్నారు. మరి ఆ క్రేజీ కాంబోలో సినిమా అంటే అది సాధ్యపడేది కాదు, సుబ్బరామిరెడ్డి ఏదో ఉత్సాహంలో అలా మాట్లాడారు.. అని చాలా మంది అనుకున్నారు.

అది జరిగే పని కాదు.. ఏదో అలా అన్నారంతే.. అని కొంతమంది పెదవి విరిచారు. అందుకు తగ్గట్టుగానే.. సుబ్బరామి రెడ్డి ప్రకటన ఇన్నాళ్లూ కేవలం ప్రకటనగానే మిగిలిపోయింది. నెలలు గడిచిన తర్వాత ఇప్పుడు సుబ్బరామిరెడ్డి మళ్లీ ఆ అంశంపై మాట్లాడటమే.. ఆసక్తికరంగా మారిందిప్పుడు.

ఇటీవలే తను పవన్ కల్యాణ్, త్రివిక్రమ్ లను వారి ప్రస్తుత సినిమా సెట్స్ మీద కలిశాను అని, ఆ సమయంలో చిరు-పవన్- త్రివిక్రమ్ ల కాంబో సినిమా గురించి చర్చించాను అని సుబ్బరామిరెడ్డి అన్నారు. త్వరలోనే ఆ సినిమా పట్టాలెక్కుతుందని సుబ్బరామిరెడ్డి చెప్పారు. ‘ప్రస్తుతం చిరంజీవి, పవన్ కల్యాణ్ లు వారి వారి సినిమాలతో బిజీగా ఉన్నారు. అవి పూర్తి అయిన వెంటనే... వారిద్దరి కాంబినేషన్ లో త్రివిక్రమ్ దర్శకత్వంలో సినిమా మొదలవుతుంది..’ అని సుబ్బరామిరెడ్డి పేర్కొన్నారు. ఆ సినిమాను చాలా గ్రాండ్ గా రూపొందిస్తాను అని, అది తెలుగులో అత్యంత భారీ సినిమా అవుతుందని సుబ్బరామిరెడ్డి చెప్పడం విశేషం.

ప్రస్తుతం చిరంజీవి ‘ఉయ్యాలవాడ’ సినిమాతో, పవన్ కల్యాణ్ తన చేతిలో ఉన్న సినిమాలతో బిజీగా ఉన్నారు.. వీటి తర్వాత వెంటనే వీరిద్దరి కాంబోలో సినిమా అని సుబ్బరామిరెడ్డి మెగాభిమానులను ఉత్సాహపరుస్తున్నారు. మరి అది ఏ మేరకు సాధ్యం అవుతుందో చూడాలి.