జీవితాంతం ఆ బాధ అలా వుండిపోతుంది: చిరు

ప్రముఖ దర్శకుడు, దర్శకరత్న దాసరి నారాయణరావుని చివరిచూపు చూసుకునే భాగ్యం తనకు దక్కలేదని ఆవేదన వ్యక్తంచేశారు మెగాస్టార్ చిరంజీవి. హైదరాబాద్‌ ఫిల్మ్‌నగర్‌లో శనివారం సాయంత్రం తెలుగు ఫిలిం ఛాంబర్ ఆఫ్ కామర్స్ నిర్వహించిన దాసరి నారాయణరావు సంస్మరణ సభలో మాట్లాడుతూ... దాసరితో తనకున్న అనుబంధాన్ని గుర్తుచేసుకున్నారు చిరు. దాసరి చనిపోయినప్పుడు తాను విదేశాల్లో వున్న కారణంగా అప్పుడు వెంటనే హైదరాబాద్ రాలేకపోయానని, అలా ఆయనను కడసారి చూసుకునే అవకాశాన్ని కోల్పోయానని చిరంజీవి విచారం వ్యక్తంచేశారు. జీవితంలో ఈ అసంతృప్తి ఎప్పటికీ అలా వుండిపోతుందని అన్నారు చిరు.

దాసరి మృతితో తెలుగు సినీపరిశ్రమ ఓ పెద్ద దిక్కుని కోల్పోయింది. పరిశ్రమలో ఎవరికి ఏ సమస్య వున్నా ఆయన చొరవ తీసుకుని మరీ ముందుండి పరిష్కరించే వారు. పరిశ్రమలో ఎవరికి ఏ కష్టం వచ్చినా.. అది తన కష్టంగా భావించి వారిని ఆదుకునే వారు. అటువంటి పెద్ద మనిషి ఇవాళ మన మధ్యలో లేకపోవడం నిజంగా బాధాకరం అని ఆవేదన వ్యక్తంచేశారు చిరంజీవి.

ఖైదీ నంబర్‌ 150 ప్రీ-రిలీజ్‌ ఫంక్షన్‌లో ఓసారి, ఆ తర్వాత మే 4న అల్లు రామలింగయ్య అవార్డు ప్రజెంటేషన్ సెరెమనీలో మరోసారి దాసరి తమతో కలిసి పాల్గొన్నారని గుర్తు చేసుకున్న చిరు... దాసరి పాల్గొని ప్రసంగించిన ఆఖరి రెండు వేడుకలు కూడా అవే అయ్యాయని అన్నారు.

దాసరి మొదటిసారి అనారోగ్యంతో ఆస్పత్రిపాలై తిరిగి ఇంటికొచ్చాకా ఆయన్ని అలా చూసి తనకు నోట మాటరాలేదు. కానీ అంత అనారోగ్యంతో బాధపడుతూ కూడా ఆయన మాత్రం చిరు నీ సినిమా స్కోరు ఎంత అని అడిగారు. అత్యధిక కలెక్షన్లు సాధించిన చిత్రం అవుతుందని చెప్పగానే సంతోషంతో చప్పట్లు కొట్టారని దాసరితో జరిపిన సంభాషణని గుర్తుచేసుకున్నారు చిరు. మరొక సందర్భంలో దాసరి నారాయణ రావుని కలిసిన తాను తిరిగి అర్జెంట్ పనిమీద వెళ్లాలని చెబుతూ అక్కడి నుంచి వెళ్లిపోబోయాను. కానీ ఆయన మాత్రం నువు తినకుండా వెళ్లడానికి వీలు లేదంటూ తానే స్వయంగా దగ్గరుండి భోజనం వడ్డించారని.. అప్పుడు ఆయన చూపిన ఆ పితృ వాత్యల్సం ఎప్పటికీ మరిచిపోలేనని దాసరిని స్మరించుకున్నారు చిరు.