మెగా టిప్స్‌తో ధైర్యం వచ్చింది-కాజల్

మెగాస్టార్ చిరంజీవి అభిమానుల హృదయాల్లో చెరగని ముద్ర వేశారు. నటనలోనూ.. డాన్స్ లోనూ.. ఆయనకు తిరుగులేదు. కళ్ళతో ఆయన అభినయించే తీరు ఎప్పటికీ తెలుగు ప్రేక్షకుడు మర్చిపోలేడు. అటువంటి హీరోతో కలిసి నటించడానికి చాలా మంది తడబడుతూ ఉంటారు. వారి లిస్ట్‌లో నేను కూడా ఉన్నానంటోంది కాజల్ అగర్వాల్.

'ఖైదీ నెంబర్ 150' సినిమాలో చిరంజీవితో కలిసి నటించడానికి, ముఖ్యంగా ఆయనతో కలిసి డాన్స్ చేయడానికి చాలా భయపడ్డానని కాజల్ చెబుతోంది. డాన్స్ లో మెగాస్టార్ స్పీడ్ అందుకోవడానికి తాను చాలా కష్టపడవలసి వచ్చిందని అంటోంది. తన ఇబ్బందిని గ్రహించిన చిరంజీవి డాన్స్ విషయంలో కొన్ని టిప్స్ చెప్పారట.

చిరు ఇచ్చిన దైర్యంతోనే ఆయనతో కలిసి డాన్స్ చేయగలిగానని.. ఆయన అందించిన ప్రోత్సాహం ఎప్పటికీ మర్చిపోలేనని తన సంతోషాన్ని వ్యక్తం చేస్తోంది. చిరు, కాజల్‌లు జంటగా నటించిన ఈ చిత్రం సంక్రాంతి కానుకగా విడుదల కానుంది.