యూరోప్ వెళ్లిన 'ఖైదీ నెం.150'

మోస్ట్ వాంటెడ్ 'ఖైదీ నెం.150' అలియాస్ మెగాస్టార్ చిరంజీవి యూరప్ వెళ్లాడు. చిరు మరోసారి అభిమానుల గుండెల్లో 'ఖైదీ నెం. 150' గా బందీ అయిన విషయం తెలిసిందే. సంక్రాంతి కానుకగా జనవరిలో ఈ సినిమాను విడుదల చేసే దిశగా వేగంగా షూటింగ్ జరుగుతోంది. ఇప్పటికే 75% షూటింగ్ పూర్తయినట్లు సమాచారం. చిరు, కాజల్ అగర్వాల్ మధ్యలో రెండు డ్యూఎట్ల చిత్రీకరణ కోసం సినిమా యూనిట్ యూరోప్ వెళ్లింది. స్లోవేనియా, క్రొయేషియా (సెంట్ర‌ల్ యూర‌ప్‌) లాంటి అరుదైన దేశాల్లో ఈ పాటలను చిత్రీకరించనున్నట్లు రాంచరణ్ వెల్లడించారు. చిరుని దృష్టిలో పెట్టుకొని దేవీ శ్రీ ప్రసాద్ ప్రత్యేకంగా ఈ సినిమాకు సాంగ్స్ కంపోజ్ చేస్తున్నారు.

ఈ చిత్రానికి మెగాస్టార్ త‌న‌య సుశ్మిత డిజైన్ చేసిన కాస్ట్యూమ్స్‌కి ప్ర‌త్యేక‌మైన గుర్తింపు ద‌క్కింది. మెగాస్టార్‌ని త‌న కెరీర్‌లోనే అత్యంత స్టైలిష్‌గా సుశ్మిత డిజైన్స్ ఆవిష్క‌రించాయ‌న్న టాక్ వ‌చ్చింది.



శ్రీమతి కొణిదెల సురేఖ సమర్పణలో, కొణిదెల ప్రొడక్షన్ హౌజ్ పతాకంపై, రాంచరణ్ నిర్మాతగా, దర్శకుడు వి.వి వినాయక్ 'ఖైదీ నెం.150'ని తెరకెక్కిస్తున్నారు. ఇది తమిళంలోని 'కత్తి' సినిమాకి రీమేక్. 2017 మోస్ట్ అవైటింగ్ మూవీగా ఖైదీ నెం.150 ట్రెండింగ్ లో ఉంది.