కేరళ కుర్రాడిని పెళ్లాడిన ‘కలర్స్’ స్వాతి

‘కలర్స్’ కార్యక్రమంతో బుల్లితెర నుంచి వెండితెరపై మెరిసిన స్వాతి.. ఎలాంటి హడావిడీ లేకుండా తన మనసుకు నచ్చిన వ్యక్తిని వివాహం చేసుకుంది. గురువారం రాత్రి (ఆగస్టు 30)న తన కుటుంబ సభ్యులు, స్నేహితుల మధ్య నిరాడంబరంగా పెళ్లి చేసుకుని సర్‌ప్రైజ్ చేసింది. ఇండస్ట్రీకి చెందిన పెద్దలెవరూ లేకుండానే స్వాతి పెళ్లి చేసుకోవడం గమనార్హం.

స్వాతి నటిగానే కాకుండా డబ్బింగ్‌ ఆర్టిస్ట్‌గా, సింగర్‌గానూ తన ప్రతిభ చాటింది. తెలుగు, తమిళం, మలయాళం సినిమాల్లో చక్కని నటనతో ఆకట్టుకుంది. కేరళకు చెందిన మలేసియన్‌ ఎయిర్‌లైన్స్‌ పైలట్‌ వికాస్‌తో స్వాతి కొంతకాలం ప్రేమలో ఉంది. ఎట్టకేలకు పెద్దలు అంగీకరించడంతో ఇద్దరూ వేదమంత్రాల మధ్య ఒక్కటయ్యారు. సెప్టెంబర్‌ 2న కొచ్చిలో స్వాతి, వికాస్‌ల వెడ్డింగ్ రిసెప్షన్ జరగనుంది.