అమ్మ ఇలా చేస్తుందనుకోలేదు: పృధ్వీరాజ్ తనయుడు

'థర్టీ ఇయర్స్ ఇండస్ట్రీ ఇక్కడ' అనే డైలాగ్‌తో తనకంటూ ఓ ఫేమ్ సంపాదించుకున్న ప్రముఖ హాస్యనటుడు పృధ్వీరాజ్ విడాకుల వివాదంపై ఆయన చిన్న కొడుకు శ్రీనివాస్ స్పందించారు. "గత ఏడాది కాలంగా అమ్మా-నాన్నల మధ్య మనస్పర్ధలు వున్న మాట వాస్తవమే కానీ పరిస్థితి మరీ ఇలా చేయి దాటిపోతుంది అని అనుకోలేదని, అమ్మ ఇలా చేస్తుందని నాన్న కూడా ఊహించలేదు'' అని విచారం వ్యక్తంచేశారు శ్రీనివాస్.

" గత ఏడాది కాలంగా ఇంట్లో ఎవ్వరికీ మనశ్శాంతి లేదు. అమ్మా, నాన్న, అక్క, అన్నయ్య, తాను.. ఇలా అందరం డిస్టర్బ్‌డ్ గానే వున్నాం. నాన్న కూడా మళ్లీ పరిస్థితి సద్దుమణుతుందనే భావించారు కానీ ఇలా జరుగుతుందని అనుకోలేదు. అమ్మని ఎవరో తప్పుదోవ పట్టిస్తున్నారు. అంతకుమించి ఇందులో ఇంకేం లేదు. నాన్న ఇప్పుడిప్పుడే కెరీర్‌లో ఎదుగుతున్నారు అని అనుకునే స్టేజ్‌లో ఇలా కుటుంబకలహాలు రచ్చకెక్కడం బాధగా వుంది. నాన్నను నా చిన్నప్పటి నుంచీ చూస్తున్నాను... ఆయన ఎంతో కష్టపడి పైకొచ్చారు. ఇప్పుడిప్పుడే పేరు తెచ్చుకుంటున్న సమయంలో ఆయనపై ఆరోపణలు రావడం బాధగా వుంది" అని ఆవేదన వ్యక్తంచేశారు శ్రీనివాస్.

పృధ్వీరాజ్‌పై విడాకుల కేసు పెట్టిన ఆయన భార్య శ్రీలక్ష్మి.. ఆయన నుంచి తనకి నెలకి రూ.10 లక్షలు భరణం ఇప్పించాల్సిందిగా విజయవాడ ఫ్యామిలీ కోర్టుని ఆశ్రయించడం.. ఆమె ఫిర్యాదుపై స్పందించిన కోర్టు, పృధ్వీరాజ్ నెలకి రూ. 8 లక్షలు ఆమెకి భరణం చెల్లించాల్సిందిగా తీర్పు ఇవ్వడం తెలిసిందే.