హీరో రాజ్ తరుణ్ తండ్రికి మూడేళ్ల జైలు శిక్ష

నకిలీ బంగారాన్ని తాకట్టు పెట్టి రుణం పొందిన కేసులో సినీ నటుడు రాజ్ తరుణ్ తండ్రి నిడమర్తి బసవరాజుకు కోర్టు మూడేళ్ల శిక్ష విధించింది. వైజాగ్‌లోని వేప గుంటకు చెందిన 53 ఏళ్ల బసవరాజు సింహాచలం ఎస్‌బీఐలో స్పెషల్‌ అసిస్టెంట్‌ క్యాషియర్‌గా విధులు నిర్వహించేవారు. 2013లో తన భార్య రాజ్యలక్ష్మితో పాటు మరి కొందరు వ్యక్తుల పేరిట నకిలీ బంగారాన్ని బ్యాంకులో తాకట్టు పెట్టి రూ.9.85 లక్షల రుణం తీసుకున్నారు.

బ్యాంకు అధికారుల తనిఖీల్లో నకిలీ బంగారం బయటపడింది. దీంతో బ్యాంకు మేనేజర్‌ గరికిపాటి సుబ్రహ్మణ్యం ఫిర్యాదు మేరకు అప్పట్లో గోపాలపట్నం సీఐ ఈదుల నరసింహారావు కేసు నమోదు చేశారు. కేసును విచారించిన మెట్రోపాలిటన్‌ కోర్టు బసవరాజుకు మూడేళ్ల జైలు, రూ.20 వేల జరిమానా విధిస్తూ తీర్పునిచ్చింది.