ముంబైలో ‘మన్మథుడు’కి ఎంత క్రేజో చూశారా..

అక్కినేని నాగార్జునను చూసేందుకు అభిమానులు ఎగబడ్డారు. ఆ..! హైదరాబాద్‌లో ఇది మామూలేగా అని కొట్టిపారేయకండి. ‘మన్మథుణ్ని’ చూడటానికి జనం భారీ సంఖ్యలో పోటెత్తింది మన భాగ్యనగరంలో కాదు.. దేశ ఆర్థిక రాజధాని ముంబైలో. అవును.. నగరంలో ఓ సినిమా షూటింగ్‌ సందర్భంగా ఇది చోటు చేసుకుంది. రామ్‌గోపాల్‌ వర్మ దర్శకత్వంలో నాగార్జున హీరోగా ఓ సినిమా తెరకెక్కుతున్న విషయం తెలిసిందే. దీనికి ‘ఆఫీసర్‌’ అనే పేరును ఖాయం చేశారు.

‘ఆఫీసర్’ సినిమా షూటింగ్ ప్రస్తుతం ముంబైలో జరుగుతోంది. మంగళవారం (మార్చి 6) ఓ ఫైటింగ్ సన్నివేశాన్ని తెరకెక్కిస్తుండగా నాగ్‌ను చూసేందుకు అభిమానులు ఎగబడ్డారు. ఓ అభిమాని ఆ దృశ్యాలను బంధించి సోషల్ మీడియాలో షేర్ చేశాడు. దీంతో ఆ వీడియో కాస్త వైరల్‌గా మారింది.

ఈ వీడియోను రీట్వీట్ చేస్తూ దర్శకుడు రామ్‌గోపాల్‌ వర్మ స్పందించాడు. ‘నాగార్జునను చూసేందుకు అభిమానులు పెద్ద సంఖ్యలో తరలివచ్చారు. అతి కొద్ది మంది తెలుగు వారికి మాత్రమే ముంబైలో ఇలాంటి క్రేజ్ ఉంటుంది’ అని వర్మ రాసుకొచ్చాడు.
Crowd gone berserk to catch a glimpse of @iamnagarjuna Very few Telugus have such kinda craze in #Mumbai https://t.co/Mo23Y8qbPY — Ram Gopal Varma (@RGVzoomin) March 7, 2018
‘ఆఫీసర్’ సినిమాలో నాగ్‌ పోలీస్‌ అధికారి పాత్రలో అలరించనున్నారు. సినిమాలో ఆయనకు జతగా మైరా సరీన్‌ నటిస్తోంది. ‘శివ’ లాంటి సూపర్ డూపర్ హిట్ తర్వాత వర్మ-నాగ్‌ కాంబినేషన్‌లో వస్తున్న ఐదో సినిమా ‘ఆఫీసర్’పై అభిమానుల్లో ఇప్పటికే భారీ అంచనాలు నెలకొన్నాయి.