అందరి ‘చరిత్ర’లు బయటపెడ్తా: దాసరి

‘నేను నా జీవిత చరిత్ర రాస్తున్నా..ఇప్పటికీ మూడున్నర సంవత్సరాలైంది అది రాయడం మొదలుపెట్టి...పూర్తి కావడానికి ఇంకా యేడాదిన్నర పడుతుంది. అందులో చాలా వాస్తవాలు ఉంటాయి. మహామహా గొప్పవాళ్లు, పెద్దవాళ్లు అని అనుకువాళ్ల అసలు చరిత్రంతా దాంట్లో ఉంటుంది’ అని దర్శక నిర్మాత, కేంద్రమాజీ మంత్రి దాసరి నారాయణరావు అన్నారు.

సీనియర్ జర్నలిస్టు పసుపులేటి రామారావు రచించిన ‘వెండితెర అరుణ కిరణం టి.కృష్ణ’ పుస్తకావిష్కరణ శనివారం జరిగింది. ప్రముఖ నటుడు గోపిచంద్ తండ్రి అలనాటి దర్శక నిర్మాత టి. కృష్ణ జీవితంపై ఈ పుస్తకం రూపొందింది.

టి.కృష్ణ పై రాసిన పుస్తకాన్ని దాసరి నారాయణరావు ఆవిష్కరించారు.

ఈ సందర్భంగా సామాజిక బాధ్యతతో ఎన్నో సినిమాలు తీసిన టి.కృష్ణను సినీ పరిశ్రమ కలకాలం గుర్తుంచుకోవాలని అన్నారు.

బాధ్యత మరిచి సినిమాలు తీస్తున్నవారు...సినీ ఇండస్ట్రీలో పెరిగిపోయారని ఆయన ఆవేదన వ్యక్తం చేశారు.

తాను రాసే జీవిత చరిత్రలో అందరి జీవితాలు బయటపెడ్తానని ఆయన స్పష్టం చేశారు. తెలుగు సినీ పరిశ్రమలో ముక్కుసూటిగా ఉండే దాసరి...ఎంతో మంది కళాకారులను పరిచయం చేశారు.
మోహన్ బాబు, ఆర్.నారాయణ మూర్తిలాంటి వాళ్లు ఆయన స్కూలు నుంచి వచ్చినవారే.