‘పద్మావత్’ తెలుగు ట్రైలర్ చూశారా!

ఎన్నో వివాదాలతో వాయిదాలు పడుతూ వస్తున్న ‘పద్మావత్’ ఎట్టకేలకు విడుదలకు నోచుకుంది. ఈ సినిమా హిందీలోనే కాకుండా తెలుగు, తమిళ భాషల్లో కూడా విడుదల కానుంది. ఈ సందర్భంగా చిత్ర యూనిట్ తెలుగు ట్రైలర్‌ను యూట్యూబ్‌లో విడుదల చేశారు. బాలీవుడ్‌లో భారీ చిత్రాలకు పెట్టింది పేరైన సంజయ్ లీలా భన్సాలీ ప్రతి ఫ్రేమ్‌ను ఓ అద్భుతాన్ని తలపించేలా ఈ సినిమా రూపొందించాడు.

‘‘ఆందోళనలను ఖడ్గం కొనపై ఉంచుతాడే... వాడే రాజపుత్రుడు. ఇసుక నావను తీసుకుని సముద్రాన్ని సవాలు చేస్తాడే... వాడే రాజపుత్రుడు. తల తెగిపడినా మొండెం శత్రువులతో యుద్ధం చేస్తూనే ఉంటుందే వాడే రాజపుత్రుడు’’ అంటూ గాంభీర్యమైన డైలాగులతో ఈ ట్రైలర్ ఉంది. చివరిలో పద్మవత్ పాత్రదారి దీపికా పదుకునే చెప్పే డైలాగ్.. చిత్రంలో తన పాత్ర స్థాయిని వ్యక్తం చేసేలా ఉంది. ‘‘రాజపుత్ర ఖడ్గానికి ఉన్నంత శక్తి.. రాజపుత్ర గాజులకీ ఉంటుంది’’ అంటూ.. ట్రైలర్ ముగిసింది.

ఈ సినిమాలో తమ రాణి పద్మిని గురించి తప్పుగా చూపిస్తున్నారని రాజ్‌పుత్‌ కర్ణిసేన కార్యకర్తలు ఆందోళనలు చేస్తున్న సంగతి తెలిసిందే. ఈ వివాదాలు ఎన్నో మలుపులు, సెన్సార్ కట్‌లను దాటి ఈ సినిమా విడుదలకు నోచుకుంది. దీపికా పదుకొణె, రణ్‌వీర్‌ సింగ్‌, షాహిద్‌ కపూర్‌ ప్రధాన తారాగణంగా రూపొందిన ఈ చిత్రం జనవరి 25న విడుదల కానుంది.
తెలుగు ట్రైలర్‌ను ఇక్కడ చూడండి.