‘దేశంలో దొంగలు పడ్డారు’ టీజర్.. మూటలో ఏముందో తెలుసా?

ప్రముఖ హాస్యనటుడు ఆలీ సమర్పణలో సారా క్రియేషన్స్ పతాకంపై వస్తోన్న సినిమా ‘దేశంలో దొంగలు పడ్డారు’. ఆయన తమ్ముడు ఖయ్యూమ్ హీరోగా నటిస్తున్నాడు. సమీర్, సీనియర్ నటుడు పృథ్వీ ముఖ్య పాత్రలు పోషించారు. గౌతం రాజ్‌కుమార్ దర్శకత్వం వహించారు. ఈ సినిమా టీజర్‌ను మంగళవారం విడుదల చేశారు. టీజర్ చాలా ఆసక్తికరంగా ఉంది. టీజర్ చూస్తుంటే ఓ కిడ్నాప్ చుట్టూ తిరిగే కథలా అనిపిస్తోంది.

పోలీస్ పాత్ర పోషించిన సమీర్.. ‘మూటలో ఏముంది’ అని ఖయ్యూమ్‌ను గన్‌తో బెదిరించడం, ఆ మూటతో ఖయ్యూమ్ ప్రయాణం, మూటలో అమ్మాయి ఉంది అని లారీ డ్రైవర్‌తో చెప్పడం ఈ సన్నివేశాలన్నీ ఆసక్తికరంగా ఉన్నాయి. చూస్తుంటే ఇదేదో థ్రిల్లర్ మూవీలా ఉంది. వాస్తవానికి ఈ చిత్రం అమెరికాలోని బ్లాక్ బేర్ (మెల్‌ఫోర్డ్) ఫిల్మ్ ఫెస్టివల్‌కు ఎంపికైంది. కాగా, రామగౌతమ్ ఈ చిత్రాన్ని నిర్మించారు. సంతోష్ డొంకాడ సహ నిర్మాత. శేఖర్ గంగనమోని సినిమాటోగ్రఫీ అందించగా.. సాండీ సంగీతం సమకూర్చారు.