Pawan Kalyan: ‘వకీల్ సాబ్’ ఎంట్రీ సీన్.. పవన్ కోసం అంతసేపు వెయిట్ చేయాల్సిందేనట

భారీ అంచనాలతో ‘వకీల్ సాబ్’ చిత్రం రేపు (ఏప్రిల్ 9)న విడుదల కానుంది. పవన్ కళ్యాణ్ రీ ఎంట్రీ మూవీ కావడంతో సినీ, రాజకీయ వర్గాల్లో కూడా ఈ సినిమాపై ఆసక్తికరమైన చర్చ నడుస్తోంది. పవన్ కళ్యాణ్ లాయర్‌గా నటించడంతో ఎప్పుడెప్పుడు వెండితెరపై పవర్ స్టార్ వెలుగులు చూద్దామా అని పవన్ కళ్యాణ్ అభిమానులు ఎదురుచూస్తున్నారు.

ఇప్పటికే ఏపీ తెలంగాణ ఏరియాలలో ‘వకీల్ సాబ్’ థియేటర్స్ వద్ద అభిమానులు సందడి షురూ చేశారు. పెద్ద పెద్ద ఫ్లెక్సీలు కటౌట్‌లతో హంగామా చేస్తున్నారు. ఈ తరుణంలో ఈ చిత్రానికి సంబంధించి పలు ఆసక్తికరమైన విషయాలను చెప్పారు నిర్మాత దిల్ రాజు.

ముఖ్యంగా పవన్ కళ్యాణ్ ఎంట్రీ ఎలా ఉండబోతుంది? పవన్ కళ్యాణ్ మొదటి నుంచి లాయర్‌గానే కనిపిస్తారా? వకీల్ సాబ్‌కి ఫ్లాష్ బ్యాక్ స్టోరీ ఉంటుందా? లాంటి అనేక ప్రశ్నలు అభిమానుల్లో ఉండగా.. ఈ సినిమాలో పవన్ కళ్యాణ్ ఎంట్రీ ఎప్పుడు ఉంటుందో చెప్పారు దిల్ రాజు.

వకీల్ సాబ్ సినిమా 15 నిమిషంలో పవన్ కళ్యాణ్ ఎంట్రీ ఉంటుందని చెప్పారు. అక్కడ నుంచి కథలో భాగంగా ఎంట్రీ ఇస్తారని చెప్పారు. పవన్ కళ్యాణ్‌ని అభిమానులు ఎలా చూడాలని కోరుకుంటారో.. దానికి ఏమాత్రం తగ్గకుండా వకీల్ సాబ్ ఉంటారని అన్నారు. ముఖ్యంగా ఈ సినిమాలో ఆయన స్టైల్ ఆఫ్ ప్రజెంటేషన్ చాలా డిఫరెంట్‌గా ఉంటుందని చెప్పారు దిల్ రాజు.

ఇదిలాఉంటే.. ఏ పెద్ద హీరో సినిమా అయినా హీరో ఎంట్రీ కోసం ప్రేక్షకులు ఎంతో ఆసక్తిగా ఎదురు చూస్తుంటారు. అందుకే లేటు చేయకుండా హీరోని ఇంట్రడ్యూస్ చేస్తుంటారు. అయితే ఈ సినిమాకి కథ కీలకం కావడంతో ముందుగా కథను చూపించి 15 నిమిషాల తరువాత కథానాయకుడు ఎంట్రీ ఇవ్వబోతున్నాడు. సో.. వకీల్ సాబ్‌లో పవన్ కళ్యాణ్ ఎంట్రీ చూడాలంటే 15 నిమిషాలు వెయిట్ చేయాల్సిందే.