రివ్యూలపై స్పందించిన 'రాజా ది గ్రేట్' డైరెక్టర్

సినిమా రివ్యూల ట్రెండ్, రివ్యూలు రాసే విమర్శకుల వైఖరిపై ఇటీవల టాలీవుడ్ పరిశ్రమలో చర్చలు జోరుగా సాగుతున్నాయి. పలువురు సినీ ప్రముఖులు సైతం రివ్యూలపై బాహటంగానే తమ అభిప్రాయాన్ని వ్యక్తపరుస్తున్నారు. అందులో కొంతమంది రివ్యూలని తీవ్ర స్థాయిలో విమర్శిస్తే, ఇంకొంతమంది అదే స్థాయిలో సమర్ధించారు. ఈ నేపథ్యంలో నిత్యం ఏదో ఓ చోట జరుగుతున్న సినిమా ఫంక్షన్స్, ప్రమోషన్ ఈవెంట్స్ వంటివి రివ్యూలపై చర్చలకు వేదికలవుతున్నాయి. రేపు రిలీజ్‌కి రెడీ అవుతున్న రాజా ది గ్రేట్ సినిమా ప్రమోషన్స్‌లో పాల్గొన్న డైరెక్టర్ అనిల్ రావిపూడికి కూడా రివ్యూలపై స్పందించాల్సిందిగా కోరారు అక్కడున్న ఫిలిం జర్నలిస్టులు.

ఫిలిం జర్నలిస్టుల కోరిక మేరకు రివ్యూలపై స్పందించిన అనిల్ రావిపూడి.. " కొన్నిసార్లు మంచి రివ్యూలు సొంతం చేసుకున్న సినిమాలు బాక్సాఫీస్ వద్ద బోల్తా కొట్టాయి. అంటే దీనినిబట్టి చూస్తోంటే, అటు ఫిలింమేకర్స్ కానీ ఇటు రివ్యూ రైటర్స్ కానీ ఎవ్వరూ పర్‌ఫెక్ట్ కాదని అర్థమవుతోంది" అని అభిప్రాయపడ్డాడు. అందుకే ఫిలింమేకర్స్‌ని కానీ రివ్యూ రైటర్స్‌ని కానీ విమర్శించాల్సిన అవసరం లేదని స్పష్టంచేశాడు అనిల్ రావిపూడి. ఇదే విషయమై రవితేజను కూడా వివరణ కోరగా.. మాస్ మహారాజ మాత్రం స్పందించకుండానే తెలివిగా తప్పించుకున్నాడు.