కన్నడ డైరెక్టర్ గురుప్రసాద్ అరెస్ట్.. కోర్టు విచారణకి డుమ్మా

సీనియర్ డైరెక్టర్ గురుప్రసాద్ (Director Guruprasad) అరెస్ట్ కన్నడ ఇండస్ట్రీలో చర్చనీయాంశంగా మారిపోయింది. 2006లో వచ్చిన మఠ సినిమాతో శాండిల్‌వుడ్‌కి పరిచయమైన ఈ దర్శకుడు పదుల సంఖ్యలో అక్కడ సినిమాలు తీశాడు. అయితే.. గిరినగర పోలీసులు అతడ్ని అరెస్ట్ చేసి కోర్టులో హాజరు పరచగా.. గంటల వ్యవధిలోనే బెయిల్‌పై విడుదల అయ్యాడు. ఇంతకీ అతను చేసిన తప్పు ఏంటంటే? ఓ చెక్ బౌన్స్ కేసులో కోర్టుకి హాజరు కాకపోవడమే. శ్రీనివాస్ అనే వ్యక్తి నుంచి డైరెక్టర్ గురుప్రసాద్ పెద్ద మొత్తంలో డబ్బు తీసుకున్నాడు. కానీ ఆ డబ్బులు రిటర్న్ ఇవ్వకుండా మాయమాటలు చెప్తూ తప్పించుకు తిరుగుతున్నాడట. దాంతో శ్రీనివాస్ ఇటీవల నిలదీయగా.. ఓ చెక్ ఇచ్చాడట. అయితే.. ఆ చెక్ బ్యాంక్‌‌లో వేయగా.. తగినంత బ్యాలెన్స్ లేకపోవడంతో ఆ చెక్ బౌన్స్ అయ్యింది. దాంతో శ్రీనివాస్ కోర్టుని ఆశ్రయించారు.

విచారణలో భాగంగా డైరెక్టర్ గురుప్రసాద్‌ నేరుగా హాజరు కావాలని కోర్టు ఆదేశించింది. కానీ.. సరైన కారణం చెప్పకుండా గురుప్రసాద్ గైర్హాజరయ్యాడు. దాంతో గురుప్రసాద్‌పై కోర్టు నాన్‌ బెయిల్‌‌బుల్ వారెంట్ జారీ చేసింది. దాంతో గిరినగర పోలీసులు గాలించి గురుప్రసాద్‌ని అరెస్ట్ చేసి కోర్టు ముందు హాజరుపరిచారు. అనంతరం అతను బెయిల్‌పై విడుదల అయ్యాడు.

కన్నడ ఇండస్ట్రీ గత ఏడాదికాలంగా పాజిటివ్‌గా వార్తల్లో నిలుస్తోంది. కేజీఎఫ్ -1, 2లతో శాండిల్‌వుడ్‌ పవర్‌ని ప్రశాంత్ నీల్, యశ్ దేశానికి చూపించగా.. కాంతార సినిమాతో రిషబ్ శెట్టి ఆ క్రేజ్‌ని మరింత పెంచాడు. మధ్యలో రక్షిత్ శెట్టి కూడా చార్లీ 777తో సత్తాచాటాడు. అక్కడి నుంచి వెలుగులోకి వచ్చిన హీరోయిన్ రష్మిక మందన ప్రస్తుతం పాన్ ఇండియా హీరోయిన్‌గా వరుస సినిమాలు చేస్తోంది.

Read Latest Telugu Movies News , Telugu News