వర్ధమాన నటిపై వేధింపుల కేసు: హీరో అరెస్ట్‌

వర్ధమాన హీరోయిన్‌పై అత్యాచారయత్నం కేసు దర్యాప్తు వేగవంతం చేశారు. ఈ కిరాతకానికి తలపడ్డ హీరో సృజన్‌, డైరెక్టర్ చలపతిని విజయవాడ పోలీసులు శనివారం (ఆగస్టు 19) అరెస్టు చేశారు. నిందితులిద్దరినీ న్యాయస్థానం ముందు హాజరుపరిచారు. వీరికి 14 రోజుల రిమాండ్‌ విధిస్తూ న్యాయమూర్తి ఆదేశాలు జారీ చేశారు. దీంతో నిందితులను విజయవాడ సబ్‌ జైలుకు తరలించారు.

విజయవాడ సమీపంలో నిడమనూరు వద్ద ఓ వర్ధమాన నటిని లైంగికంగా వేధించిన ఘటన గత సోమవారం అర్ధరాత్రి జరిగిన విషయం తెలిసిందే. సినిమాలో హీరోయిన్‌‌గా అవకాశం ఇస్తామని ఆశజూపి ఆమెను చలపతి, సృజన్‌ తమ కారులో హైదరాబాద్‌ నుంచి భీమవరం తీసుకెళుతూ ఈ అఘాయిత్యానికి తెగబడ్డారు. ప్రయాణ సమయంలో ఆమెపై అసభ్యంగా ప్రవర్తించిన నిందితులు లైంగిక వేధింపులకు గురి చేశారు.

కారులో పెనుగులాట జరగడంతో అది పక్క నుంచి వెళుతున్న ఓ లారీని ఢీకొంది. గాయాల పాలైన ఆ యువతిని విజయవాడలో ఓ ప్రైవేట్‌ ఆసుపత్రిలో చేర్పించి వెళ్లిపోయారు. కారులో జరిగిన విషయం ఎవరికైనా చెబితే పుట్టగతులుండవని బెదిరించినట్లు యువతి తెలిపింది. ఆ తర్వాత ఆమె కుటుంబసభ్యుల సాయంతో పోలీసు స్టేషన్‌లో ఫిర్యాదు చేసింది.